Shillong, Jymmang 16 : U Myntri ka Tnad Labour Bah Shakliar Warjri ula bthah ia baroh ki Labour Inspector ba kin hiar jurip bad talasi ia baroh ki jaka ba tei jingtei ha kylleng ka Jylla ban ioh bat ia ki nongbylla mynder ri ba wan rung beain.
‘Dang ha ki khyndiat taiew bala lah, nga la pyniaid ia ka jingialang bishar kam bad nga la bthah bad ai ka por ia baroh ki Labour Inspector ba kin pynlong ia ka jingjurip ha baroh ki jaka ba tei jingtei ha man ki Block bad ki District. Ngi la shimkhia bha haba phai sha kane ka kam” ong u Bah Shakliar haba iakren bad ki nongthoh khubor hynne ka sngi Thohdieng.
Ula pyntip ia kane haba jubab ia ka jingkylli halor ka jingioh bat ia kiba bun ki nongbylla mynder ha ka jingtalasi nongbylla da ki sengbhalang ha kylleng ka Jylla.
Haba pynpaw ba ka long kongsan ia baroh ki nongbylla mynder ban register ialade bad ka Tnad, u Bah Shakliar ula ong “Ngam don jingtip ia kane bad ka jingtieng ia ka jingrung kyrthep ki mynder. Kam pat poi sha ka jingtip jong nga hynrei lada don kum kata, ngin sa khmih ia kane”.
Halor ka jingbym lah ki contractor ban register ia ki nongbylla ba ki ailam ha kylleng ki jaka ba tei jingtei, u Myntri ula ong ” Shisien ba aikam contract ia uno uno u briew, shuwa ban aiti ia ki work order, u dei ban register ia baroh ki nongbylla. Ka long kongsan kane”.
