Shillong, Naiwieng 14 : U Symbud Myntri Rangbah ka Jylla ba khmih ia ka Tnad PWD Bah Prestone Tynsong ha ka sngi Ba-ar, ula pyntip ba ula dep bthah ia u Chief Engineer ka National Highway, ba un wad iaka jingshisha halor ki jingkynnoh pyrshah ia ka Dhar Construction kompani halor ka jingpyntreikam ia ka surok Dawki-Amlarem-Jowai.
Haba iakren bad ki nongthoh khubor, u Bah Prestone ula ong “Nga la bthah ia u Chief Engineer ka National Highway (ban wad) la ka jingkynnoh ka dei kaba shisha ne em bad ngin sa peit ba haduh katno kata ka jingtorti haba pyntreikam ia ka project la ka dei ka surok ne kino kino ki project hapoh ka Jylla namar kim dei ban long kumta”.
U Bah Prestone ula ong ba ha ka jingshisha, ia kane ka bynta jong ka surok ka dei kaba la khmih da u RO Station na Guwahati, kaba dei jong ka National Highway Authority of India (NHAI).
Ha ka 4 tarik Naiwieng, ka Joint Action Committee (JAC) ba kynthup ia ki Khlieh Synshar Shnong ka War Jaintia bad ka seng Hynniewtrep Youth Council (HYC), kila byrngem ban mudui da ka mukotduma hapoh ka Iingkashari Meghalaya High Court pyrshah ia ka jingkynnoh bamsap jong ka Dhar kompani haba pyntreikam ia ka surok Dawki-Amlarem-Dawki (NH-40E) (mynta NH-206) bala bei pisa da ka Sorkar Pdeng haduh T. 43 klur.
U Bah Prestone ula ong “La ka jingbuh dak iong (Blacklist) ka donkam ne em, ia kata ngin ieh ynda la sdang ka kam. Shisien baka kam kala sdang, ngan sa tip shai halor ka kaiphod ba ngan sa ioh . Hynrei kumba nga ong, kane ka dei kaba don jingiadei bad ka NHAI namar ka dei ka National Highway bad kam hap satia ha ka bor jong ka Sorkar Jylla. Ka NHAI ka dei kaba don ka bor ban leh eiei halor kane ka project”.
