Shillong, Naiwieng 14 : Ka Sorkar Jylla kala rai ban wanrah noh da ka Office Memorandum (OM), ban lah pynjanai ia ka jingtreikam jong ka Tnad Public Works Department (PWD) ka Jylla.
Ia kane ka rai la shim ha ka jignialang bala pynlong da u Symbud Myntri Rangbah Bah Prestone Tynsong bad ki lai tylli ki tnad Sorkar ba kynthup ia ka Tnad Planning, Finance bad ka PWD hynne ka sngi Ba-ar.
Haba iakren bad ki nongthoh khubor, u Bah Prestone ula ong “Ki lai tylli ki Tnad kila ai ia ki jingbatai ba bniah (presentation) halor kawei ka kam bad kata ka long ban pynjanai ia ka rukom treikam jong ka Tnad PWD la ka dei na ka bynta ki surok thymmai, la ka dei ka jingshna ia ki surok thymmai, jingmaramot ia ki surok ne ban pynbit pynbiang ia ki surok rim”.
Kat kum ka jingong jong u, ia kane la lem namar mynta ka Jylla Meghalaya kala don ym duna ia 10000 km tang ka surok lajong (state road) lait noh ki National Highway bad ki surok bala aiti sha ka NHIDCL.
“Ngi la iakren ia baroh ki mat ba donkam bad shen ngin sa wanrah da ka OM” ula ong bad bynrap “Ha ka jingai jingbatai, ngi la iakren ruh halor ka jingdonkam ban pyniaphiah kyrdan (categorize) ia ki surok ka Jylla ban ithuh ia kino kita ki major road, ki minor road, kino ki village road (surok shnong) bad kino ki surok ba bun tam ka jingiaid ki kali”.
“Kine ki dei ki kam ba ngi iakren bad ngi la dep rai lut ia baroh bad ngin sa pynkhreh ia kine kiei kiei baroh ha ka dur jong ka Office Memorandum” ula ong.
