Shillong, Iaiong 8: Ki bor district ka East Khasi Hills kila bthah ia baroh ki tnad sorkar ba kin shim ia ki lad pynkhreh shuwa ka jingwan ka aiom slap kum ka kam ba hakhmat eh ban pynthikna ia ka jingiatreilang kaba treikam bha haba wan jia kano kano ka jinglynshop ki bor ka mariang ha kane ka lyiur 2026.
Ia kane ;a jingbthah ha ka jingialang District Coordination jong ka Incident Response Team (IRT) kaba la long ha Conference Hall jong ka Deputy Commissioner, East Khasi Hills District ha ka sngi Balang.
Ia kane ka jingialang la pyniaid da ka Deputy Commissioner bad Chairperson (DDMA) Kong RM Kurbah bad la wan ban iashimbynta da u Additional Deputy Commissioner bad CEO (DDMA) u Bah S Warjri ryngkat bad ki ophisar na ki tnad bapher bapher, ki Block Development Officer, Sub Divisional Officer (C) bad ki nongmihkhmat na ka Armed bad Paramilitary Forces.
La lum ia ka jingialang da ka jingthmu ban khmih ia ka jingpynkhreh lypa jong ki tnad bapher hashwa ka jingwan ka aiom lyiur.
Ha kane ka jingialang, la shim ia ka rai ba baroh ki tnad kidei ban leh ia ki kam ki ban long kum ka jingpynkhreh lypa, kiba kynthup ia ka jingjurip ia ki jaka kiba ju don ka jingshlei um, ban khmih ia ki dieng kiba la tlot bad ki sainar elektrik kiba lah ban khyllem ne buh ha ka jingma lada jur ka lyer ne eriong bad ther u lapbah lapsan.
Ka Deputy Commissioner kala banjur ia ka jingkongsan ban pynlong man la ka por ia ki ‘Mock Exercise’ ha kylleng ki ophis sorkar ban pynkhlain ia ki jingai jingshakri jong ki tnad haba mih ki jingjia kiba kyrkieh, ban leh ia ka Fire Safety Audit ia ki jingtei ne building kaba long ka bynta kaba kongsan ha ka jingpynkhreh bad la bthah ia baroh ki tnad ba kin khmih bad ban lum jingtip ia baroh ki jingdon jingem kiba ki dang don khnang ba ka jingai jingshakri bad jingiarap kyrkieh kan long kaba iaid ryntih.
Ka Chairperson kala kyntu ia baroh ki ophisar sorkar ba kin long kiba peitngor bad ban pynthikna ba kidei ban leh kloi bad shimkhia mardor haba don kino kino ki jingjia lynshop ki bor mariang.
Ka jingialang kala kut da ka jingiengskhem jong ki bor pyniaid district ban iada ia ka jingim jong ki briew bad ia ki jingdon jingem lyngba ka jingpynwandur bha ia ka rukom treikam bad ka jingdon ia ka jingiatreilang bad ki tnad bapher bapher.
Lada don kano kano ka jingjia jong ka jingwan lynshop ki bor mariang, ki paitbah ki lah ban pyntip da kaba phone ha u nombar 112 na ka bynta ban ioh mardor ia ka jingiarap ne jingkyrshan.
