Shillong, Naitung 31 : Ki bor District ka East Khasi Hills ha ka sngi Balang, kala hukum ban buh ia ki Pulit ban pahara ha Lum Survey khnang ban pynthikna ba kan nym don ka jingthut ka shongsuk shongsain ha ka sngi shong bishar ka Iingkashari ha ka 19 tarik Nailar.
Kane ka rai ka dei kaba la shim hadien ka jingialang bala pyniaid da ka Deputy Commissioner RM Kurbah kaba la iashim bynta da u Superintendent of Police ka District, u CEO ka Shillong Contonment Ment bad u President bad Secretary ka seng Hynniewtrep Youth Council (HYC).
“Ban pynthikna ba kam nym mih kano kano ka jingkular, ngi la bthah ia u SP ban buh ia kii pulit ha ka thain tad hadien ba ka Iingkashari kala pynmih ia ka hukum namar ka jingshong bishar ia ka mukotduma kan long ha ka 19 tarik Nailar” ong ka kong Kurbah haba iakren bad ki nongthoh khubor.
“Ngi la rai ban ap ia ka hukum jong ka Iingkashari bad ngin bud ia kaei kaba ka bthah” kala ong.
Haba kylli halor ka kaiphod jong ka jingwan jurip ba pynlong ha ka 8 tarik Jymmang, ka Deputy Commissioner kala pyntip ba u Defence Estate Officer ula pyntip ba nalor ki lain gut (kiba la ujor sha Iingkasahri), ki don ruh kiwei, kiba sah beain ha Lum Survey.
“Hynrei, naba ka Iingkashari kala pynmih ia ka stay order, ngi hap ban ap ia ka hukum jong ka hadien ba dep shong bishar ha ka 19 tarik Nailar. Halor kane ka nongrim, u DEO un sa shim ia ka rai” ula ong haba bynrap ba ka jaka kam dei satia jong ka Sorkar Jylla hynrei jong ki bor shipai.
Nalor kane, ka DC ka pyntip ba ki don palat 80-90 tylli ki Iing ha Lum Survey kat kum ka jingleit survey bala pynlong da u DEO. “Kine ki briew kila shong la shah ha kane ka jaka khlem ka jingbit. Ki dei kiba beain bad kiba shong khlem jingbit” kala bynrap.
Ha kajuh ka por, u President ka HYC Roykupar Synrem ula ong ba ka Council kan ym banse ban shim ia ki sienjam ba tyngeh lada kine ki nongshong beain kim shah kyndang noh na Lum Survey hadien ka 19 tarik Nailar.
“Ka jinghiar jurip dang shen kala sei madan ba bun ki briew ba sah ha kane ka jaka ki dei ki ba sah beain. Ngin ap ia ka hukum ban pynmih da ka Iingkasahri hadien ka 19 tarik Nailar. Hynrei, lada ym leh eiei ia kine kiba sah beain, ngin ym don lynti pat da kumwei hynrei ban leh eiei hi dakaba tyngeh” ula maham.
