Shillong, K’lyngkot 29: Ka Sorkar India kala buh por ia baroh ki Jylla ka Ri kynthup ka Meghalaya, ba kin pyndep lut noh ia baroh ki project shna surok jong ka skhim PMGSY-I bad PMGSY-II hapoh u bnai Lber 2024.
Ia kane la pyntip da u Symbud Myntri Rangbah ka Jylla ba khmih ia ka Tnad PWD (Roads) Bah Prestone Tynsong, hadien ka jingialang bishar kam bad ki Heh Ophisar, kaba iakren halor ka jingpyndep ia ki project jong ka PMGSY-I, II bad III.
U Bah Prestone ula ong ba bun na ki project ka PMGSY-I bad II kila jan dep lut lait noh ki project kiba kongsan kiba sah malu mala hynrei ula pynpaw ia ka jingsngewskhem ba ka Tnad kan sa lah pyndep 100 na ka 100 ia kine ki project hapoh ka por bala buh.
“Ngam da don jingtip satia ia ka jingjrong jong ka surok hapoh ka PMGSY-I bad II namar la buh jingkhein da ka Census bad kane ka Census kala sdang naduh u 2003. Ka thong hi ka long ba pynpoi surok sha ki Shnong ki bym pat don surok” ula ong.
Halor ka PMGSY-III, u Bah Prestone ula ong ba kila don katto katne ki contractor kiba la dep pyntrei ia ka kam.
U iathuh ba ka PMGSY-III hi ka dei ka jingshna pynheh bad siang rong ia ki surok bala don lypa ha Jylla bad ka thong ka long 1250 Km.
Haba kylli halor ka jingsniew ki surok ha ki shnong Nongkyndong, u Symbud Myntri Rangbah ula ong ba kiei kiei baroh yn ym lah satia ban leh tang shisngi namar kiba bun ki jingduna haba phai sha ki surok hapoh ka Jylla.
U Bah Prestone ula kam ba ka Sorkar naduh u snem 2018 kala pynlong ym duna ia ka T. 10,000 klur tang ha ka kam shna surok.
