Shillong, Jylliew 13 : Ka Sorkar Jylla kala bthah ia u Chief Secretary ka Jylla Bah DP Wahlang ba un pule bad khmih bniah ia ka kaiphod bala aiti da ka Expert Committee halor ka jingpynkylla thymmai ia ka State Reservation Policy.
Haba pyntip ia kane ha ka sngi Thohdieng, u Nongaiktien ka Sorkar bad Myntri Bah Paul Lyngdoh ula iathuh ba ka Expert Committee kala dep aiti ia ka kaiphod sha ka Sorkar Jylla.
“Kumta, ka dei ka rukom ba ka Sorkar kan shong bishar ia kine ki kaiphod. Namar kata, ngi la aibor ia u Chief Secretary ka Jylla lem bad ki Heh Ophisar ba kin khmih bniah ia ka kaiphod” ula bynrap.
Haba pynpaw ba ka kaiphod ka dei kaba bun sla bad rben bha, u Bah Paul ula iathuh ba ia ka jingkynthoh lyngkot (summary) jong ka kaiphod la wanrah hapoh ka jingialang jong ka kynhun Myntri.
“Ia ka kaiphod ba pura yn sa wanrah hapoh ka Dorbar jong ka Iingdorbar Thaw Ain ka Jylla ka ban sa long ha u bnai Nailur, 2025” ula pyntip shuh shuh.
Ka Expert Committee bala khlieh da u Justice (Retired) Mool Chand Garg, ka dei kaba la thung da ka Sorkar Jylla ha ka 12 tarik Nailur 2023, ban shong bishar biang ia ka Reservation Policy ka Jylla hadien ka jingdawa ban pynkylla noh na kiba bun balang.
