Shillong, Rymphang 02 : Palat 500 klur ka song pisa jong ka 15th Finance Commission, ka dang dei ban pyllait sha ki lai tylli ki Autonomous District Council (ADC) ka Jylla namar ka jingslem ban aiti ia ki Utilization Certificate (UC).
Ia kane la pyntip da u Symbud Myntri Rangbah ka Jylla ba khmih ia ka District Council Affairs Bah Prestone Tynsong hadien ka jingialang bishar kam bad ki Chief Executive Member (CEM) ki lai ADC- KHADC, JHADC bad GHADC hynne ka sngi Thohdieng.
U Bah Prestone haba iakren bad ki nongthoh khubor ula ong ba ka jingialang ka iadei bad ka jingaiti slem jong ki ADC ia ki Utilization Certificate halor ka jingpyntreikam ia ka Grant jong ka 15th Finance Commission.
“Kumba T.500 klur ka pisa ka dei dei ban pyllait sha ki District Council” ula ong.
U Symbud Myntri Rangbah ula pyntip ba ka Sorkar kala bthah ia baroh lai tylli ki ADC ba kin aiti noh ia ki UC hapoh kane ka taiew ban wan.
“Hadien ngin sap hah ia ki (UC) sha ka Sorkar India katba ngi dang ap ia ka installment kala ar jong ka 15th Finance Commission ba kan pyllait ia ka pisa sha ki ADC” ula bynrap.
Haba kylli, u Bah Prestone ula ong ba ka jingeh (halor ka jingphah slem ia ki UC) ka dei namar ba ka Sorkar India kala pyntreikam ia ka sienjam ba thymmai kum ka jingthaw ia ka portal, kaba shim bun ia ka por.
 ka Jylla namar ka jingslem ban aiti ia ki Utilization Certificate (UC).){kind=link}