Shillong, Risaw 08 : Ka Sorkar Jylla kala bthah ia u Deputy Commissioner ka West Jaintia Hills District ba un ai jingiarap pisa (exgratia) ba kot T. 16 lak sha ki bahaiing jong ki shi-iing shisem kiba iap na ka jingtwa khyndew ha Pynthor Langtein.
Kat kum ka kyrwoh na DIPR, la iathuh ba la bthah ia u DC ka WJH ba un pyllait noh ia ka song jingiarap pisa ba T. 4 lak shi khlieh sha ki bahaiing jong kine ki 4 ngut ba iap.
Saw ngut ki dkhot jong kawei ka Longiing, kaba kynthup ia u Kpa, ka Kmie bad arngut ki Khun, kila shah tep im ha ka khyndew kaba twa bad taplup ia ka Iing ka sem jong ki hynne ka step phyrngap ha Pynthor, Langtein, kaba hap hapoh ka Thadlaskein Block.
Kine ki shi-ing ki dei kiba la tip kyrteng u Bah Diangki Phawa ba 31 snem, ka kurim kong Pynjanai Ryngkhlem ba 25 snem bad ki arngut ki Khun u heprit Edify Ryngkhlem ba 6 snem bad i heprit Wiladaroi Ryngkhlem ba 3 snem ka rta.
Lah bthah ruh ia u Block Development Officer (BDO) ka Thadlaskein C&RD Block ba un ai ia kino kino ki jingiarap kiba donkam kyrkieh.
