Shillong, Nohprah 21 : Ka Sorkar Jylla kala pynmih ia ka jingbthah ia ki paid nongshongshnong ba ki dei ban bud pyrrkhing ia ki kyndon iada khlam Covid ha kane ka aiom lehkmen namar ka jingkiew kiba ioh pang Covid na u khniang JN.1 ha ki katto katne ki Jylla ka Ri.
Ka Tnad ka Koit ka Khiah kala pynmih ia kane ka jingbthah ba ong ba ki paidbah ki dei ban bud ia ki kyndon ban deng ia ki mask, ban thet ia ki kti bad kiar na ka jingialum paidbah.
Ka ong ba kito kiba don ia kiwei pat ki jingpang kum ka Hypertension, Diabetes, Kidney bad kiwei kiwei, ki dei ban phikir bha lada ki don jingshet met lane flu.
Kane ka jingbthah kala mih hadien ka jingialang bishar kam halor ka jingpang Covid-19 hapoh ka Jylla, kaba la pynlong da ka Myntri ka Koit ka Khiah Kong Ampareen Lyngdoh hynne ka sngi Palei.
Ha kane ka jingialang la iashimbynta da ki Heh bapher bapher ka Tnad ka Koit ka Khiah.
La pyntip ba ka Integrated Disease Surveillance Prokram jong ka Tnad ka Koit ka Khiah kala peit pyrman bha ia une u khniang covid ba thymmai haba iathuh ba haduh mynta hi ym pat don nongpang Covid hapoh ka Jylla.
