Shillong Nailur 16: Ka Meghalaya State Commission for Protection of Child Rights (MSCPCR) kala bthah ia ki pulit ka jylla ban pynsted ia ka jingtohkit halor ka jingshah pyniap ka khynnah kaba dang 4 snem ka Insaphira Lyngdoh Mawnai ha Nongrah Nonglum.
“Ka MSCPCR kala bthah shuh shuh ia ki pumit bad ia ki kynhun tohkit ia ka jingdonkam ban pynsted ia ka jingtohkit halor katei ka jingshah pyniap dusmon. Ka jingtohkit kaba kloi bad kaba biang ka long kaba kongsan bha, ym tang ban ai ia ka jingbishar hok, hynrei wat ban shim ia ki lad ki lynti ban pynkut noh ia ka jingsngewsih kthang jong ki bahaiing bahasem na kane ka jingjia kaba sngewshyrkhei” la pynpaw ka Chairperson jong ka Commission ka Agatha Sangma ha ka kyrwoh khubor kaba la phah mynta ka sngi Baar.
La lap ia ka met jongka Insaphira Lyngdoh Mawnai kaba la jah na la iing, na ka jaka ba lang um kaba don ha kawei ka iing kaba dang shna kaba don hajan ka iingsah ka jongka ha ka sngi Nyngkong.
Ki Pulit ka jylla kila thaw mardor ia ka special investigation team (SIT) kaba la khlieh da u SP (City) Bah Herbert Kharkongor ban tohkit halor ka jingshah pyniap jong ka Insaphira bad ban kem ia ki runar kiba donkti ha kane ka kam runar.
Ka Agatha Sangma kala pyntip ba ka Commission kala leit mih mardor sha katei ka longing hadien ba kala ioh jingtip shaphang katei ka jingjia kaba sngewsih halor ka jingshah pyniap jong ka heprit kaba dang 4 snem ka rta ha Nongrah.
Ka Commission kala don ha katei ka iing kaba don hapdeng ka jingsngewsih kthang baroh shi sngi bad kala ai ia ka jingkyrshan ha kum kane ka khyllipmat jong ka jingsngewsih bad kala pynthikna bay n la leh ia ki kam kiba donkam hapoh NEIGRIHMS, kynthup ia ka autopsy, kadei kaba la leh thikna ha ryngkat bad ka jingkhmih bha ia ka kam.
“Ka MSCPCR ka iengskhem ba ka jingduh noh ia kano kano ka jingim kadei ka mat kaba sngewkhia jur khamtam haba ka dei ka jingduh noh ka jingim ki khunlung ki khynnah. Kiba la shah shim jubor noh ia ka jinglong luilui bad ia ka lawei. Ka Commission ka pynpaw ia ka jingsngewlem ia kane ka longing kaba mad ia ka jingsngewsih kthang bad ka ieng ryngakt bad ki ha kum kane ka khyllipmat kaba ki don hapdneg ka jingeh” kala ong.
Ha kum kane ka por, ka Sangma kala ong ba ka Commission ka la shim ruh ba ka long kaba kongsan, ban pynkynmaw ia ki paidbah ba ka jingpynsaphriang ia ki video bad ki dur jong ki khynnah rit ki bym itynnad ha ki rynsan social media kam dei eh tang ba ka long kaba ktah ia ka jingsngew ki bahaiing hasem bad ka bym iahap hynrei ka dei ruh ka jingpynkhein ia ka ain.
“Kum kitei ki jingleh ki hap hapoh u pud jongka Juvenile Justice Act (JJA) bad ka khring ia ki jingshah pynshitom, kynthup iaka jingshah set hapoh phatok” kala pynapw.
 kala bthah ia ki pulit ka jylla ban pynsted ia ka jingtohkit halor ka jingshah pyniap ka khynnah kaba dang 4 snem ka Insaphira Lyngdoh Mawnai ha Nongrah Nonglum.){kind=link}