Shillong, Naiwieng 28 : Ka iingkashari Meghalaya High Court ha ka sngi Palei,kala hukum ia u Director General of Plice (DGP) barim Lajja Ram Bishnoi ba un file ia ka affidavit bynrap halor ka mukotduma bala mudui pyrshah ia u ba u pyndonkam ia u nombor plate thok ha ka kali.
Ha ka hukum, ka Iingkashari kaba khlieh da u Justice B Bhattacharjee kala ong “La sngap ia ki nongsaid ain ba mihkhmat ia ki kynhun liang mamla. U A Goyap ba mihkhmat ia u nongmudui haba iasaid ia ka kam, ula shaniah ha ki katto katne ki kot ki sla ki bym shym la dei shibynta jong ka record. U Bah ND Chullai, AAG ba iarap da u Bah ER Chyne ba mihkhmat ia ka Jylla, ula pynpaw ia ka jingeh ban iasaid ia kane ka kam namar ka jingbym ioh lypa ia ki kot ki sla kiba la pyndonkam da u nongiasaid ba mihkhmat ia u Nongmudui”.
“Namar kata, u nongmudui u dei ban file ia ka affidavit bynrap ban wanrah ha ka record ne buh jingthoh ia baroh ki kot ki sla kiba ula pyndonkam” ong ka Iingkashari.
Ha ka 22 tarik Risaw, ka Iingkashari kala hukum ia ka Sorkar Jylla ban aiti ia ka chargesheet pyrshah ia u DGP barim.
Ha ka 9 tarik Jymmang, u Pulit Assistant Inspector General (AIG) ba shah sospon ka Tnad Meghalaya Police Bah GK Iangrai, ula ujor ia ka ejahar pyrshah ia u Lajja Ram Bishnoi hashuwa ba un shongthait kum u DGP, haba kynnoh ba ula pyndonkam bakla bad leh hok ia u nombor plate jong ka kali ba u pyndonkam.
U Bah Iangrai uba la shah kem ha ka 2 tarik Naiwieng, 2022 halor ka jingkynnoh bam klop ia ka pisa ba la mang ban tei ia ka Nationwide Emergency Response System (NERS) ha Shillong, ula kyrpad ruh ban pynshitom pyrshah ia ki dkhot jong ka Inquiry Committee ba tohkit pyrshah ia u.
