Shillong, Naiwieng 28 : Ka Iingkashari Meghalaya High Court, ha ka sngi Palei, kala pan ia ka kaiphod halor ka jing iaid ki 6 tylli ki mukotduma kam bymman ba sahteng pyrshah ia ki MP bad MLA hapoh ka Jylla.
Ha ka hukum bala pynmih hadien ba shong bishar ia kane ka kam, ka Iingkashari kaba la khleih da u Justice HS Thangkhiew, kala ong ba u Advocate General ula pyntip ba ka jingiaid jong ka mukotduma ka dang long kumjuh kat kum ka kaiphod ba 17-9-2024.
“Kat kum ka kaiphod barim, ki don 6 tylli ki mukotduma ba dang sahteng. Buh ia kane ka kam ha ka 03-02-2025 na ka bynta ka kaiphod ba thymmai” kala bthah.
Kane ka mukotduma pyrshah ia ki MP bad MLA ka dei kaba la register halor ka jingbthah jong ka Iingkashari Supreme Court ha ka 9 tarik Naiwieng, 2023.
