Shillong, Naiwieng 28: Ka Sawmer SC kala pynrem ia ka Ryntih SC da 2-1 ha ka jingiakhun ha ka OC Blue Shillong Premier League 2024 kaba la long ha ka sngi Palei ha SSA Stadium, Polo.
Mar ia sdang ka jingailehkai football, ka Ryntih kala ioh ia ka kabu ksiar haba kala ioh ia ka Penalty haka minit kaba 6 haba u rangialehkai ka Sawmer ula kum ktah da ka kti ia ka bol, hynrei u nongapkol ka Sawmer u Pyrshanbanbha ula rynsied bad ioh ban iada ia ka bol ban ym ioh rung shapoh kol.
Hadien kane, ka Sawmer kala ioh ban thep iaka kol ha ka minit kaba 13 lyngba u Rheadolf Nongneng Daloi bad naduh nangne ka jingiakhun kala sdang ban itynnad hapdeng kine ki ar tylli ki kynhun hynrei ka Ryntih kam shym la lah ban thep kol ha ka kylla step.
U Diego Khyriem ka Sawmer, u Basuklang Bina bad Wanshanlang Dkhar jong ka Ryntih, kila ioh ia ki kabu kiba biang bha ban thep kol hynrei kim shym la lah pat ban thep kol.
Ha ka jingiakhun ha ka kylla miet, ki rangialehkai jong kine ki ar tylli ki kynhun kila ialehkai bha bad dei ha ka minit kaba 90’+3 ba u Allen Lyngdoh Nongbri ula thep ia ka kol kaba u nongapkol ka Sawmer u Pyrshangbanbha Dkhar ym shim la lah ban leh eiei, kane ka kol kala pyniakhaid ia ka jingiakhun hapdeng ka Ryntih pyrshah ia ka Sawmer.
Tang hadien shi minit hi (90’+4) ka Sawmer kala ioh ban thep ia ka kol ia kaba ki rangialehkai ka Ryntih kim shym la poi pyrkhat bad kane kala pynthikna syndon ia ka Sawmer ban khur ia ka nongjop.
Kane ka jingjop kala pynlong mynta ia ka Sawmer ban don ha ka kyrdan ka baar da ka ioh 11 point, katba ka Ryntih kala bteng ban mad ia ka jingrem kaba 5 sien bad kala bteng ban don sha traiduh da kaba ioh tang 3 point.
Ka Sawmer kan iakhun biang ha ka sngi Nyngkong pyrshah ia ka Shillong Lajong FC ha ka por 11:30 mynstep bad ha ka por 2:30 mynsngi ka Laitkor SC kan iakhun pyrshah ia ka Langsning FC.
 ka Sawmer kala ioh ban thep ia ka kol ia kaba ki rangialehkai ka Ryntih kim shym la poi pyrkhat bad kane kala pynthikna syndon ia ka Sawmer ban khur ia ka nongjop.){kind=link}