Shillong, Rymphang 12 : Ka Iingkashari Meghalaya High Court ha ka sngi Balang, kala hukum ia ki bor Sorkar ba kin pyndep noh ia ka jingjurip ia baroh ki weighbridge ha Jylla hapoh ka 30 tarik Iaiong mynta u snem.
Ia kane ka hukum la pynmih da ka Kashari u Chief Justice IP Mukerji bad Justice W Diengdoh hadien ba shong bishar ia ka PIL bala mudui da u Tennydard M Marak, uba la kynnoh ba briew ka Sorkar kila pyllait suk ia ki trok ba kit palat pud ba kin iaid lyngba ki weighbridge bad kane kala wanrah iaka jingduhnong kaba khraw ha ka jinglum khajna ia ka Sorkar.
Kane ka khajna ka dei kaba lah ban lum ha ka dur jong ka kuna bai kit palat pud, ka khajna bad ka royalty lada dei ki mar ba shalan shabar ka Jylla bad kiwei kiwei.
“Ka jingjurip ia baroh ki weighbridge ka dei ia kaban hap pyndep hapoh ka 30 tarik Iaiong, 2025. Dei ruh ban aiti ia ka kaiphod kat kum ka hukum ba pynmih ha ka 5 tarik Nohprah, 2024 kata hapoh ka 2 tarik Jymmang, 2025” kala ong.
Kala bthah ruh “Dei ban pynkhreh ia ka thup jong ki weighbridge bad phah da ka Sorkar sha u nongmudui hapoh ka 19 tarik Rymphang, 2025. Lada u nongmudui u sngew ba ki dang don ki weighbridge ba la ieh, un sa pynpaw ia kane ka sha ka Sorkar Jylla bad kan pynkhreh ia ka thup ba khatduh. Ia kae ka thup bala pynkhreh da ka Sorkar yn khein kum kaba khatduh”.
“Ka jingjurip ba arkynta dei ban pynlong da ka nongshah mudui kata ruh ha ka por ba dang bun bha ka jingiaid kali lyngba ki weighbridge” kala ong.
