Shillong , NOV 5: Ka Iingkashari Meghalaya High Court haka sngi Thohdieng kala bthah iaka sorkar jylla ba kadei ban shna iaka Memorandum of Procedure ban pyntreikam thikna iaki kyndon aiñ khamtam ha kaba iadei bad ka rukom pyniap pathar ia ki mrad.
“Ka jylla ka dei ban leh bha ha kaban shimkhia halor ki jingai jingmut ban shna iaka memorandum of procedure khnang ba kan don ka rukom pyntreikam kaba thikna iaki kyndon ain bad ban nym don ka rukom leh pathar ia ki mrad” la pynpaw ka Division Bench haka hukum kaba kala pynmih haka jingbishar iaka PIL kaba la ujor da ka Gau Gyan Foundation.
Ka iingkashari kala pynpaw ba ki nongujor kila ai jingmut ba dei ban pyntreikam da ki kyndon ain ne ka memorandum of procedure kaba dei ban mih naka jingialang kaba dei ban pynlong man la ka por bad ban ailad ruh iaka ki nongmihkhmat jong ki Animal Welfare Organisation ban pynsngew ia ki jingeh ki jongki bad ban burom lem ia ki jingai jingmut ki jongki, namar ki don ki khep ba ki heh sorkar kim ju patiaw iaki jingai jingmut ha ki Committee.
Ka iingkashari kala ong, ka jingpynsngew jong ki nongujor ka long kaba don nongrim ha kaba la kdew ia ki katto katne ki mat. Ki don ki khep ba ki Committee kiba la thaw kim ju iakynduh satia bad lada kitei ki Committee ki iakynduh ruh shisien lano, tang khyndiat eh kaba mih na kitei ki jingialang.
Katei ka PIL kaba la ujor kadei halor ka rukom pynkit ia ki mrad ne ha ka rukom pyniap ia ki bad la pynpaw ruh ia kiba bun ki bynta haka rukom leh dusmon ia ki mrad.
Ka iingkashari kala ong, ki nongujor kila ong ba ka jylla kala shim ia ki kato katne ki sienjam halor katei ka mat bad ban pynthikna ba dei ban burom lem ia ki mrad da ka jingkylluid mynsiem.
Haba pynkynmaw biang iaka hukum kaba la dep ban pynmih teng, halor ka jingpyni pathar ia ki doh jongki mrad harud jong ki surok ka ailad ban ioh her ki pui pui bad kane ka rukom leh ka jia ruh wat ha ka nongbah Shilong.
“Nalor ka jingbym itynnad ban pyni thad rong iaki dkhot met jong ki mrad, ka rukom long jong ka doh ka lah ruh ban ym long kaba biang ban bam” la pynpaw shuh shuh.
Ka iingkashari kala kren ruh halor ka rukom pynkit iaki syiar, ha kaba bun tylli ki ksiar kila shah teh ki kjat bad la shu teh lkhongpong ha ki saikil ne ha kiwei pat ki kali.
“Ym lah ban len ba la ri ia ki mrad naka bynta ban ioh bam doh ia ki, hynrei dei pat ban don iaka akor kaba dei ban leh. Ka rukom leh mynta ka long kaba tohmet bha” la ong ka iingkashari.
Ki nongujor kila pynpaw ia ki 4 tylli ki mat, kaba nyngkong kadei halor ka jingpynbna paidbah ha ka12 tarik u Naitung 2019 ha kaba la bthah ban pyrkhing iaka rukom kit ia ki masi hapoh ka jylla.
Ka Baar kadei halor ka paragraph 20(V) jong ka Affidavit kaba la aiti da ka jylla haka 13 tarik u Jylliew 2022, kaba lai bad kaba saw kadei kaba iasyriem bad katei hi, ha kaba la kdew ba dei ban thaw iaka district-level lane market-level animal welfare committee bad ka monitoring committee kiban kynthup ia ki nongmihkhmat na ki kynhun kiba khmih iaka bha ka miat jong ki mrad.
Ha kaba iadei bad ka rukom kit ia ki mrad, ki nongujor kila pynpaw bakila don ki ain jong ka sorkar pdeng kaba la kdew shai iaka rukom kit ia kimrad ki bapher bapher bad ka jylla kadei ban bud ia katei.
Ha kaba iadei bad ka jingset ia ki mrad, ka Affidavit jong ka sorkar jylla kala pynpaw ba kan leh da kaba tyngeh da kaba bud ryntih ia ki kyndon jongka Prevention of Cruelty to Animals (Care and Maintenance of Case Property Animals) Rules, 2017.
Ki nongujor kila kdew ruh ba lyngba ka Rules jong u 2017, ia ki mrad kiba set dei ban buh ia ki ha kylleng ki jaka bad ban buh ruh ia ki kyndon jingpyrkhing bad kila kynthoh ruh ba ka Affidavit jong ka sorkar jylla kam shym la kdew ban don ia ki jaka kiba paka ban buh ne ri iaki mrad katba dang ap iaka rai halor kane ka mukotduma.
Ka iingkashari kala buh tarik ban bishar biang halor kane ka kam haka 16 tarik u Nohprah 2022.
