Shillong, Risaw 18 : Ka Iingkashari Meghalaya High Court kala bthah ia ka Sorkar Jylla ban khmih noh da kiwei ki lad ki lynti ba kham pher (out-of-the-box) ban pynduna ia ka jingdheng kali hapoh ka Nongbah Shillong
“La kyrpad ia ka Sorkar Jylla ba kan khmih noh da kiwei pat ki lad ki lynti ba kham pher ban pynduna ia ka jingdheng kali ha sor” ong ka Iingkashari ba kynthup ia u Chief Justice Sanjib Banerjee bad Justice W Diengdoh ha ka hukum bala pynmih hadien ka jing bishar ia ka PIL halor kane ka kam hynne ka sngi Balang.
Ka Sorkar Jyla kala dep ban file ia ka report halor kane ka mukotduma.
Hynrei ka Iingkashari ka sngew ba wat hapdeng ki plan bala dep ba aiti shen bad ki jingkdew ba bniah ha ka kaiphod kaba don haduh san sla, ka jinglong jingman ha ki surok pat kam I don jingkylla satia naduh ba shong bishar ia kane ka kam.
“Kiba bun ki lynti iaid la shah knieh noh ha ki nongshong dukan madan, kaba pynbor ia ki nongiaid nongieng ban hap iaid ha ki surok kiba la khim lypa, ban lah iaid beit iaid ryntih ki kali” kala ong haba kdew ba kum kane ka jinglong jingman la lah ban iohi naduh ka thain Laitumkhrah Shillong.
Ka Iingkashari kala bthah ruh ia ki nongmudui bad nongshah mudui No 16 ha kane ka mukotduma ba kin pule ia ka kaiphod bad sa kdew ia ki jingduna bad jingbym biang kiba don ha ka.
