Shillong, Nohprah 16 : Ka Iingkashari Meghalaya High Court hynne ka sngi thohdieng kala tynjuh ia ka Sorkar Jylla halor ka jingmih ki karkhana coke ba beain ha West Khasi Hills District haba bthah ia u Chief Secretary ban khang khyrdep ia kine ki karkhana bad ban ai ia ka kaiphod hapoh ka 19 tarik Nohprah.
Haba shong bishar ia ka PIL halor kane ka kam, ka Division Bench kala ong ba ka long kaba pangmet ba ki bor Sorkar kila khein sting ia ka jingtreikam beain jong ki karkhana coke hapoh ka Jylla.
Kala ong ba ka Sorkar Jylla kala leh khyndiat eh wat hapdeng ka jingpyrshang jong ka Iingkashari ha kine ki bnai bala leit noh ban pyntreikam ia ka hukum jong ka Iingkashari Supreme Court bad ka National Green Tribunal (NGT) ban khang ia ka jingtih dewiong beain bad ka jingpynieng ia ki karkhana coke ba beain.
“Mynta ka paw ba ka Sorkar Jylla ka lah ban iarap ban iaid lait ia kine ki hukum bad iadon bynta lang bad ki nongpyniaid jong kine ki karkhana coke” ong ka Iingkashari.
Haba pynpaw ba ki karkhana coke kim dei ki cottage industry kaba lah ban pyntreikam na ki tyngkong iing, kala ong b aka dei ka jingphai lyndet ban nym iohi ia ka jingtreikam pura jong kine ki karkhana coke.
Kat kum ka jingmudui, u Monu Kumar ula pyntip ba ki don palat 60 tylli ki karkhana coke ha West Khasi Hills Disrrict kaba long pyrshah ia ka kyndon ai jingbit ba tang 4 tylli ki Unit ki dei kiba la ioh jingbit ban treikam. Tang kine ki saw tylli kiba la ioh ia ki jingbit ban pynieng ia ki karkhana.
Ka shithi ba 15 tarik Nohprah bala aiti da ka Sorkar Jylla ka pyni ba kala don ka jingjurip ia kine ki karkhana da ka Committee on Environment ka Meghalaya Legislative Assembly ha ka 18 tarik Nailar, 2020 ha baroh ki karkhana coke kiba don ha ki thain Shallang, West Khasi Hills District.
Kane ka jingjurip ba la leh da u pud, ka pynpaw ba haduh 16 tylli ki karkhana coke kila treikam khlem da ioh jingbit na ki bor kiba dei khmih.
Kat kum ki kot ki sla bala aiti da ka Meghalaya State Pollution Control Board (MSPCB) bad haba pynshong nongrim lang ia ka mudui kaba la khmih lang na ka shithi ba 15 tarik Nohprah, tang saw tylli ki karkhana- ka Carbochem India, Shemphang Riangshiang, Rilangam Coke Industries bad ka MD Coke Industries ki dei kiba la ioh jingbit ban pyntreikam ia kine ki karkhana coke ha West Khasi Hills District.
Ka Iingkashari kala hukum ba ia baroh kiwei pat ki karkhana coke, katba long ka jingheh ne kano kano, dei ban bthah ba ki dei ban khang khyrdep noh naduh mynta ka sngi.
“U Chief Secretary un ai ia ka kaiphod bala pyntreikam ia kane ka hukum sha u Registrar General hashuwa ka 19 tarik Nohprah, 20220 ban pynthikna ia kaei kaba long ba man” kala ong.
Ka Iingkashari kala bthah ruh ia u Deputy Commissioner ka West Khasi Hills ha ryngkat bad ia u Superintendent of Police ba kin ai jingpynsahi balei ba ki khlem leh eiei pyrshah ia ki briew ki bym shym la leh eie pyrshah iakine ki karkhana coke kiba treikam be-ain hapoh u pud u sam jong ki.
Kala bthah ruh ia baroh ki Deputy Commissioner bad ki Superintendent of Police ha kiwei kiwei ki District ruh ba ki dei ban pynthikna ba kim dei ban don ki karkhana coke ba treikam ha u pud u sam jong ki khlem da ioh ia ka jingbit ban treikam.
Ha kajuh ka por, ka Iingkashari kala hukum ruh ban kurup ia baroh ki mar ba pyndonkam (raw material) bad ki mar bala dep sain (finish product) jong kine ki Unit kiba la shem ba ki treikam beain bad ban leh eie ruh pyrshah ia kibriew ba pyniaid ia kine ki unit kat kum ki kyndon jongka ain.
Ka Iingkashari kala buh ban shong bishar biang ia kane ka mukotduma ha ka 1 tarik u Rymphang.
