Shillong, Nohprah 09 : Ka Iingkashari Meghalaya High Court ha ka sngi Nyngkong, kala bthah ia ka Central Bureau of Investigation (CBI) ban pynduna ia ka thup ki nongai sakhi haba iadei bad ka jyrsieh “tah sia lieh” ha ka thungkam nonghikai u snem 2009 ba kynnoh donkti ia ka Myntri Sorkar Kong Ampareen Lyngdoh.
Ha ka hukum bala pynmih hadien ba shong bishar ia ka mukotduma, ka Iingkashari bala khlieh da u Chief Justice IP Mukerji kala ong “Dei ban kiar ia ka jingpynbun ba khlem nongrim ia ki nongai sakhi bad ki sakhi. Halor kine ki bynta, la kyntu ia u DGSI ban pynsngewthuh ia ka CBI ba kan pynduna ia ka thup ki nongai sakhi”.
“Tad hadien bala pynbeit khatduh ia ka thup da ka CBI, ka dei ban aiti ia ka thup sha ka Criminal Court haba iadei bad ka jingshim bishar ia ki nongai sakhi. Ka Criminal Court ka dei ban shim rai halor k aka kam. Ka dei ban shong bishar ia ki aplikeshon. Buh ia kane ka mukotduma ban shong bishar biang ha ka 20 tarik Rymphang, 2025” kala ong.
Ki don lai ngut kiba shah kynnoh ha kane ka kam mukotduma kam bymman, kawei ka dei ka Myntri jong ka Jylla, Kong Ampareen Lyngdoh, kaba bat ia ka Tnad ka Koit ka Khiah, IPR bad ka Tnad ka rep ka riang.
Ka jingtohkit ia kane ka case PS Case No.62(07)2011, under Sections 120B, 167, 466, 408, 34 IPC) la aiti sha ka Central Bureau of Investigation (CBI) ba kan tohkit da ka Iingkashari High Court.
Ka Iingkashari ka ong ba haduh mynta ym palat ia ka 20 ngut ki nongsakhi la dep ban sngap ha ka jingbishar. La ioh jingtip ba ki don haduh 162 ngut ki nongai sakhi.
Kala ong ba ka mukotduma bala mudui da ki nongshah kynnoh ka long halor ki nongrim bapher bapher. “Ka nongrim bala pynpaw da ka nongshah kynnoh ba nyngkong kaba dei ka Myntri sorkar jong ka Jylla ka long b aka Charge-sheet ka khle pynpaw ia kano kano ka jingdonkti. Na kaei kaba paw nyngkong, nga don ka jingsngew ba kane ka jingbishar kam bymman na ka PS Case No.62(07)2011 kala sahteng la palat 13 snem. Ka por kala dei ban pynwai noh ia ka” ong ka Iingkashari ha ka hukum.
 ban pynduna ia ka thup ki nongai sakhi haba iadei bad ka jyrsieh “tah sia lieh” ha ka thungkam nonghikai u snem 2009 ba kynnoh donkti ia ka Myntri Sorkar Kong Ampareen Lyngdoh.){kind=link}