Shillong, Nohprah 08 : Ka Iingkashari Meghalaya High Court hynne ka sngi palei, kala bthah ba ym pat dei ban phiah ia u pud u sam lane sieh ia ki mawpud ha ki jaka khappud ba iakajia hapdeng ka Assam-Meghalaya tad haduh ka 6 tarik Rymphang 2023.
Ia kane ka hukum la pynmih da ka Iingkashari Single Bench hadien ba shong bishar ia ka mukotduma ba kyrpad ban pynsangeh ia ka jingtreikam jong ka Memorandum of Understanding (MoU) ba iasoi da ka Sorkar Meghalaya bad Assam ha u Lber 2022 ban pynkut noh ia ka jingiakajia ha ki 6 tylli ki jaka napdeng ki 12 tylli kiba don ha ka jingkynad pud.
Ia kane ka mukotduma la mudui da ki 4 ngut ki Khlieh Nongsynshar ba kynthup ia u Syiem ka Jirang R Hamberly Wahlang, Acting Syiem ka Hima Mylliem Ainam Manik, Sirdar ka Nonglang Sirdarship Pholasly Nianglang bad Acting Chief ka Nongspung Syiemship Erald Jyrwa.
“La sngewthuh ba hapdeng kane ka khep ba tuklar, kam pat dei ban don ka jingphiah ia u pud lane pynieng ia u mawpud ha kitei ki jaka halor ka MoU ba 29 tarik Lber 2022 tad haduh ka sien shongbishar ban wan” ong u Justice HS Thangkhiew ha ka hukum.
Ka Iingkashari kala buh ban bishar biang ia kane ka mukotduma ha ka 6 tarik Rymphang, 2023.
Ha kane ka jingshong bishar, u nongiasaid ain jong ki nongmudui u P Sharma ula ong ba jia ba la don ka jingphiah ia u pud lane pynieng ia u mawpud haba pyntreikam ia ka MoU, kane ka mukotduma kan ym don jingmut shuh bad ki nongmudui ruh kin nym ioh eiei shuh.
U Advocate General A Kumar ula pynpaw ba kam pat sngew donkam ban pynmih ia kano kano ka hukum ha kane ka khep namar nyngkong, ym lah satia ban pynthikna ia ka jingthmu jong ki nongmudui bad kan ym don ruh kano kano ka jingduhnong ia ki nongmudui lada pyniaid shakhmat ia ka MoU.
Hynrei ka Iingkashari ka ong bahaba khmih ia ka jinglong jong ka kam bad ka jingpynpaw da u Advocate General, la paw ba donkam ban file ia ka affidavit ba pyrshah (Objection) khnang ba ka Iingkashari kan lah ban mynjur ia ka jingkyrpad jong ki nongmudui.
“La ai jingbit ia u AG ban file ia ka affidavit ba pyrshah ia kane ka jingkyrpad ki nongmudui” ong ka kashari.
