Bthah ka DSEL ia ki skul ban shimkhia ia jingshngain ki Khynnah namar ka jingjur slap

Aibor ia ki DC ba kin rai lada dei ban phah khang ia ki skul

Shillong, Jymmang 30 : Ka Directorate of School Education & Literacy (DSEL) kala bthah ia ki School Managing Committee ba kin shim iaki sienjam ki ban pynthikna ia ka jingshngain jong ki khynnah skul, ki nonghikai namar ka jingjur u slap ha kiba bun ki bynta jong ka Jylla.

Kala bthah ruh ia baroh ki Deputy Commissioner ba kin shim ia ki rai ha kaban phah khang dam ia ki skul ia ki skul hala ki jong ki District, kaba shong kat kum ki jingpeitthuh ia ka jinglong jingman bad ka jingioh khubor ia kiei kiba jia ba man ha ki skul.

La bthah ba ki skul kiba don marjan ki wah, ki pung ne ki pukri um, ba ki dei ban khang khnang ban lah kiar ia ki jingjia ki bym sngewtynnad.

Kat kum ka hukum bala pynmih da u DSEL Bah Banteilang Kharshandi, la ong ba kat kum ka jingbatai lypa ia ka suinbneng da ka Indian Meteorological Department (IMD), Shillong, bala pyntip da ka State Disaster Management Authority (SDMA), Shillong, bad namar ka jingjur jong u slap ha kiba bun ki bynta ka Jylla, baroh ki skul la bthah ba kin shim ia ki sienjam kiban pynthikna ia ka jingshngain jong ki khynnah skul, ki nonghikai bad ki bor pyniaid skul.

La bthah ba kim dei ban shah ia ki khynnah ba kin mih shabar ki kamra skul ha ka por longskul lait noh tang haba leit bar kata ruh ban pyllait khyndiat ngut ym bun ngut shisien leit. La bthah ba ki khynnah ki dei ban pyndonkam ia ki shatri bad ki jainjri haba ki mih ban leit bar.

Ym dei ruh ban shah ia ki khynnah ba kin ia ieng hajan ki dieng, ki post elektrik ne hapoh ki sainar elektrik ban kiar ia kino kino ki jingjia ba sngewsih. La bthah ruh ban nym shah ban ialehkai shabar ne bam ja sngi shabar ka kamra klas namar ka jinglong jong ka suinbneng.

La bthah ruh ba ki Kmie Kpa kiba leit shaw skul iala ki khun ba ki dei ban ieng ha ki jaka kiba shngain kiba lait na kino kino ki jingma.

Ka DSEL ka ong ba lada don kano kano ka jingjia kaba kyrkieh, ki skul ki lah ban phone ha u State Emergency Number 112/1070 lane ha ka District Emergency Number -1077 lait noh ka North Garo Hills kaba dei 9863468868.