Bthah ia ka Sorkar ia ka Sohra Tourism Association ban ai kyrteng ia ki jaka jngohkai ban pyndait CCTV

Pynbna ban thied sa 50 tylli ki kali PRIME ban kit nongjngohkai pyrthei

Shillong, Jylliew 17 : Ka Sorkar Jylla kala bthah ia ka Sohra Tourism Association (STA) ba kan aiti ia ka thup kyrteng jong ki jaka jngohkai bad ki jaka ba i donkam, kiba ikop lah ban mih kino kino ki jingjia, ban pyndait noh ia ki kor Close Circuit Televission (CCTV).

Ia kane la pyntip da u Myntri ki kam Jngohkai Bah Paul Lyngdoh haba iakren bad ki nongthoh khubor ha ka sngi Ba-ar haba iathuh “Hadien ba la aiti ia ka thup kyrteng sha ngi, ngin sa sdang noh mardor ban leh ia ki kam”.

U Bah Paul ula ong ba ki jaka ki ban pyndait ia ki kor CCTV kin dei ki jaka kiba wan iuhkjat bun eh ki nongshangkai kum ha Pung Umiam, Nan Polok, Sohra, Dawki bad kiwei kiwei.

U Bah Paul ula pynbna ruh ba ka Sorkar Jylla kan sa thied thymmai biang ia ki kali PRIME hapoh u bnai Naitung, ki ban kit ban rong ia ki Nongwan shangkai pyrthei kiba wan sha Jylla.

“Kin don kumba 50 tylli ki kali bad ngin sa iaid kat kum ka lynti kaba dei ban khot ia ki nongsengkam kiba kwah ban ioh ia kane ka skhim” ula bynrap.

Lah ban kdew hangne, ka Sorkar Jylla kala khein beain ia ka jingaiwai ia ki kali shimet naduh ki kali ar shaka bad saw shaka, ban pyndonkam da ki nongwankai ne nongjngohkai pyrthei, ban kamai pisa.

Haba kylli halor ka jingshngain ki nongwan shangkai pyrthei, u Myntri ula iathuh ba ka Sorkar kala rai ban pyntreikam ia ki sienjam bapher bapher ban pynthikna ia ka jingshngain bad jingiada ia baroh ki nongwan shangkai pyrthei kiba wan iuhkjat ha Jylla.

Kine ki kynthup ia ka jinghap pynrung kyrteng khlem pep ia ki nongwan shangkai, ka jingpyndait ia ki kor CCTV ha ki jaka jngohkai ba don bun eh ki nongwan shangkai bad kiwei kiwei.

U Bah Paul ula ong ba baroh ki iing basa kin hap ban pynrung kyrteng mynta ia ki briew kiba wan sah lyngba ka Tourism App, kaba la don lypa, kaba mynta la pyndonkam tang kumba 60% da ki Iing basa.

“Kaba kham kongsan eh ka dei ka rai bala shim da ka Kynhun Myntri ban khyllie kitab biang ia ka MRSSA bad ban nang ai bniat shuh shuh, ka ban iarap bha ia ngi ban tehlakam ia ki kam bymman” ula ong.

U Myntri ula ong ba ka jingjop ha ka jinglah sei pyrthei ia ki jingshisha halor ka jingshah pyniap u nongwanjngohkai na Indore, kala dei ka nuksa kaba pynsyier ia ki riew bymman ban wan pyntriem hapoh ka Jylla.

Halor ka jingkynnoh ia ka jinghiar ka jingwan kai ki briew nabar hadien ka jingjia ia u nong Indore, u Myntri ula ong “Phi tip ba ha man ki kam khamtam ha ka kam jngohkai, kin don beit ka jingkiew bad jinghiar hynrei lada phi dei ban aidaw lada don ka jinghiar, kan ym dei tang namar kawei ka jingjia. Phi hap ban peit sha ka jingdheng kali ha Sor, phi hap ban peit ia ka jingshlei um bad jinglang um ha Jorabat-baroh kine ki ktah ia ka leit ka wan ki nongjngohkai. Kine hap ban weng”.

Haba kylli, u Myntri ula pyntip ba ka Sorkar kan nym ujor mukotduma bai pynmynrain khmat shuh namar baroh kito kiba la pynbudnam sniew ia ka Jylla, kila dep ban panmap ia ka Jylla bad ia ki nongshongshnong baroh.