Nagaon, Nohprah 05: Ki jing wan pynjulor jong ki hati khlaw ha ki bynta ka Assam ki dang iai bteng haduh kine ki sngi, kata hadien ba kawei ka longkmie ia kaba la tip kyrteng kum ka Sumurmoni Garh 30 snem rta kaba dei ka kurim jong u Raju Garh kala duh ei la ka jingim hadien ba kala shah kyrdem iap ha ka kynhun ki hati khlaw ha ki bynta jong ka Gangadisha kaba hap hapoh ka Doboka forest range ha Hojai district ha ka miet sngi Thohdieng ba la lah.
Ki tyllong khubor kila kam ba kane ka longkmie ka dang ioh thiah ha la iing hadien ba ka kynhun ki hati khlaw kiba la wan ban wad bam napoh Doboka reserve forest kila thombor ia ka.
Hadien kane ka jingjia la iathuh ba la pynkit noh ia ka mardor shapoh hospital hapdeng ka jingmynsaw kaba jur hynrei kala khlad noh tang hadien katto katne por.
Ki khubor ki iathuh ruh ba na ka liang ki bor pulit bad ki heh ka tnat forest kila wan poi mardor ha katei ka jaka ba la jia ka jingshah thombor bad pynkhreh na ka bynta ban pynphai pat ia katei ka kynhun ki hati sha ka jaka khlaw.
Shuh shuh la iathuh ba mynta la bun bun taiew ka kynhun jong ki hati khlaw ki la wan ban pynher syrngiew ia ki nongshong shnong ka Doboka, Kothiatoli bad ha Kampur.
