Diphu, Naiwieng 09 : Ka tnat ka koit ka khiah ka sorkar Assam kala sakhi halor ka jingsaphriang thymmai jong ka jingpang dengue ha ki bynta bapher bapher ka jylla. Mynta kila don haduh palat 400 ngut ki briew kiba la shah ktah ha kane ka jingpang hapoh Assam kat haduh ka sngi ba Ar ba la dep.
Katkum ka kaiphot na ka National Health Mission, Assam ka jingdon jong kiba ioh ia katei ka jingpang kala kiew sha ka 427 ngut.Kane ka jingshah ktah kala wan long na ki khatsaw tylli ki district ka jylla.Ka Karbi Anglong ka dang iai neh ha ka kyrdan kaba hakhamt eh ha list ka jingdon jong kiba shah ktah ha kane ka jingpang kaba long da 400 tylli ki positive case jong ka jingpang dengue kaba iasyriem bad ka jingpang khieshohrih ne malaria.
Kane ka jingpang kala shim ruh ia ka jingim jong ki sawngut ki briew hapoh Assam, kata laingut ha Karbi Anglong district bad iwei na Kamrup Metropolitan district ka jylla.
Haduh kumba 100 tylli ki case kiba iadei bad ka jingsuba ngat ia kane ka jngpang la pynlong ia ka jingleh tes ha Diphu, ha kaba 59 ngut la shem ba ka long positive halor kane ka jingpang.Ka Diphu Medical College Hospital mynta ka don 25 ngut ki nongpang dengue kiba la wan shah sumar ha kane ka sngi ba Ar ba la lah.Nalor kata 33 ngut ki briew kiba ioh ia kane ka jingpang dengue kila wan shah sumar ha kane ka jaka ha ka sngi Nyngkong ba la lah.Kane ka dei ruh ka sien kaba nyngkong hadien katto katne sngi ba ka jingdon jong ki nongpang hapoh kane ka hospital kala kham hiar.
Ka jingpynbna halor ka jingsaphriang jong ka jingpang dengue hapoh Karbi Anglong district kala long ha kane ka taiew ba la lah.Hadien kane ki bor sorkar kila phah khang khyrdep noh ia baroh ki jaka pule puthi ha Diphu na ka bynta shitaiew kynthih khnang ban khanglad ia ka jingiabit hapdeng ki khynnah.
Na ka liang ki bor sorkar kila shim ia baroh ki sienjam hapoh ka thain na ka bynta ban pynduh ia ki jaka kha pylleng jong ki skain pyrjong ban khanglad ia kane ka jingpang, hynrei kane kam pat shym la treikam satia.Nalor ka Assam mynta ka Manipur ruh kala sakhi halor ka jingsaphriang jong kane ka jingpang.
