Nongpoh, 08 Risaw: Ki riew dusmon ki la leit ban bret da kawei ka masi ba la iap hynnin ka miet ha Wah Umran, kaba dei ka tyllong um ba sam umbam umdih sha ki shnong bapher bapher kiba don ha Sor Nongpoh.
Kane ka jaka ba wan bret ia ka masi iap ka dei kaba hap hapoh ka shnong Nongthymmai.
Ia katei ka masi iap la lap nyngkong da ki riew paidbah kynthup ki nongialam ka RBYF bad FKJGP Nongthymmai Unit, kiba la leit ban jurip ia katei ka masi iap, kaba la neh ha Check Dam.
La suba jur ba ia kane ka masi la bret na ka jingkieng ka ban leit sha ka shnong Mawrong da ka jinglap ia artylli ki tyllai ba pyndonkam ha kaban bret ia ka masi.
Ki Nongialam ka RBYF bad FKJGP ka Nongthymmai Unit kila pynpaw ba kane ka jingwan bret masi iap ka dei tang ka jingleh dusmon khlem da pyrkhat shuh ia kiwei khamtam eh ki briew ha ka thain Nongpoh kiba pyndonkam ia ka um kaba tan na kane ka wah.
Kine ki Nongialam Sengbhalang ki suba jur ba ia katei ka masi la wanrah na kiwei pat ki jaka. Kila pynpaw ia ka jingsngew khia namar ka jingbym tip ia ki daw ka jingiap jong ka masi haba ong “Ka jingma ka ap ia kiba pyndonkam ia ka um ba tan na kane ka wah lada jia ba katei ka masi ka iap na kano kano ka jingpang”.
Kine ki Sengbhalang kila byrngem ba lada ki lap ia kino kino ki briew kiba donkti, kim banse ban shim ia ki sienjam kiba tyngeh.
Lah ioh jingtip ba kila don ki briew kiba la leit ban tam noh ia katei ka masi n aka wah bad kila leit ban tep noh ia ka.
