Nongpoh, Lber 19 : Kawei ka Nongtrei jong ka Umroi Airport, kala shah thombor hynne ka step sngi Balang ha uwei u briew, uba la pduh ia ka da u bitor beer haduh ba kala mynsaw jur.
Kane ka nongtrei ka Airport ka dei kaba sahwai ha Nongrah, Ri-Bhoi District bad ba dei shnong trai na Madanrting, East Khasi Hills.
Kat kum ka khubor Pulit, kane ka jingjia kala jia ha ka por 8:30 baje eiei ha surok ban rung sha Umroi Airport. Kane ka nongtrei kala shah thombor ha ka por ba ka dang iaid lynti ban leit sha jingtrei.
Ki Pulit ki iathuh ba une u briew ula pduh ia kane ka nongtrei da u bitor beer bala lait bad u maw. Ia kane ka nongtrei la pynkit noh mar mar sha CHC Bhoirymbong hynrei namar ka jingshitom jur, la pynkynriah noh ia ka sha NEIGRIHMS ba kan ioh ia ka jingsumar kaba paka.
Ki Pulit ki pyntip ba kila ithuh mynta ia u briew uba donkti ban leh ia kane ka kam bad la tip kyrteng ia u da u Kyrshanlang Marngar ba 21 snem ka rta, uba sah ha Dongrudwah, Nongrah, Umroi.
Ki Pulit kila ioh ban kem ia une u briew hadien katto katne kynta bad kila ioh tam ruh ia ki tiar ba pyndonkam da une u briew na jaka ba jia kane ka jingjia.
Ki Pulit kila register case halor kane ka jingjia bad ka jingtohkit mynta kala iaid shakhmat.
