Shillong, Lber 19: Ka Myntri ka tnat ka Koit ka Khiah Kong Ampareen Lyngdoh hynne ka sngi Balang, ka la ong ba ka tnat ka la dep sdang pyntreikam ia ka skhim CM-Care+ ban kyrshan ia ki paidbah kin ioh ia ki jingsumar haba pang ba shitom nalor ka skhim Meghalaya Health Insurance Scheme (MHIS).
Haba kren shaki lad pathai khubor, ka Kong Ampareen kala ong ba kane ka skhim thymmai CM-Care ka tyrwa ia ka jinglut jingsep kaba kot haduh T.5 lak tyngka bad kan pyndap ruh ia ki jingduna ha ka MHIS na ka bynta ki jingsumar ba kongsan bad ki jingsumar ki bym lah ban siew lyngba ka MHIS.
Ka Kong Ampareen ka la ong ba ka CM-Care kan ai jingmyntoi ia ki paidbah ki bym dap pisa shuh na ka MHIS-PMJAY, lane kiba donkam ia ka jingkyrshan pisa na ka bynta ki jingsumar ki bym lah ban pynbiang lyngba ka MHIS.
Ka Myntri ka pyntip ruh ba ka rukom pyntreikam iaka CM-Care kan long ha ki arkyrdan, kata ha ki kyrdan District, ka jingmyntoi kan long haduh T.2 lak bad haki kyrdan State Level kan long naduh T.2 lak haduh T.5 lak.
Kala ong ba ki nongtrei Sorkar (State & Central) bad ki bahaiing jong ki kim lah ban ioh jingmyntoi na kane ka skhim thymmai.
.){kind=link}