Shillong, Nailur 22: Ki MDC ka Liang iatei hynne ka sngi Thohdieng, kila pynpaw iaka jingpyrshah kaba jur iaka Executive Committee (EC) ka Khasi Hills Autonomous District Council (KHADC) da kaba kynnoh baka EC kala khot pynlong iaka Dorbar Kyprang khlem da phah pat iaki mat iatai lane ka List of Business.
Ia kane la pynpaw da u Nongialam ka Liang iatei bah Titosstarwell Chyne haka por ba u Deputy Chairman ka KHADC u dang thmu ban pyniaid iaka Dorbar hynne ka sngi sdang jong ka Dorbar ba kyrpang ba 2 sngi.
Haba ieng ban pynpaw iaka jingpyrshah u bah Titos ula ong “Hooid ngi sngewthuh ba ka long kaba donkam ban khot iaka Dorbar Kyrpang haba don ki kam ba kyrkieh hynrei kumno ngin shim bynta ha kane dorbar ba mynta haba naka liang ka Legislative Wing ka dang phah iaki mat iatai tang 20 minit shwa ban sdang ka dorbar”.
U bah Titos ula ong ba ka EC naduh 2 taiew kala dep ban phah Notice sha ki dkhot ka Liang iatei ba pyntip ba kan don ka dorbar kyrpang hynrei ka long ka bym lah ban pdiang ba iaki mat iatai dang phah tang 20 minit shwa ban sdang ka dorbar.
Haba jubab ia kane u Chief Executive Member (CEM) ka KHADC bah Pyniaid Sing Syiem ula ong ba ka jingkhot dorbar ka long kaba la donkam palat naka bynta ka bha ka miat ka Council.
“Hoid ngi sngewthuh iaka jingpynpaw ki dkhot ka Liang iatei bad nga pynpaw ba kum kine ki jingjia kila ju jia teng ha ki snem bala dep ban khot kyrkieh iaka dorbar namar ka jingdonkam. Ngi don ki mat ba donkam kyrkieh hakaba naka liang ka Legislative Wing ka khlem lap por shuh ban pynpoi iaki mat iatai shaki dkhot. Nga kyntu ia baroh ban nym iathew hynrei iatrei lang naka bynta ka bha ka miat ka Council” la ong u bah Pyniaid.
