Shillong, Lber 14: Ka seng Jaintia Students Union kala pynpaw iaka jingbitar halor ka jingkam jong u Myntri Rangbah ka jylla Assam hapoh ka iing dorbar thawain ka jylla Assam, ba ong ba ka shnong Mukroh ka ang hap hapoh Assam.
Kane ka jingkren jong u Myntri Rangbah ka Assam kala pynbitar ia ka seng bad khamtam iaki nongshong shnong ka shnong Mukroh bad ki paid ka bri u Hynñiewtrep hi baroh kawei.
Ka seng ka phah iaka kyrwoh sha u Myntri Rangbah ka jylla ban iakren bad u Himanta u Myntri Rangbah ka jylla Assam ba ym dei ban kren laplah, da kaba kam ei iaki shnong bad ki jaka ka Meghalaya ba ki hap sha Assam.
Ka ong ba kane ka jingkren u Himanta kala nang ai ding shuh shuh bad kan wanrah iaka jingiapher jaitbynriew sa shisien hapdeng ki nong Assam bad ka jylla Meghalaya.
Ka JSU ka phah ruh iaka kyrwoh kaba shai kdar sha u Myntri Rangbah ka Assam ba u dei ban tih jylliew ban tip iaka jingshisha ba kine ki jaka ki hap haei, ha shuwa ban un kren hapoh ka Iing Dorbar thaw aiñ ka Assam namar ka jingkam ei ka jong u iaki jaka kiba hap hapoh u pud u sam ka jylla Meghalaya kan ialam bakla ia kiwei pat ki nongmihkhmat kiba don lang hapoh ka iing Dorbar thawaiñ ka Assam.
Ka seng JSU kala ong ruh ba u Himanta Biswa Sarma u dei ban tip shai ba ka shnong Mukroh ka hap hapoh ka jingpeit jingkhmih jongka JHADC bad iaka synshar khadar ruh lah ioh bor na ka JHADC ym kum ba kam u MR ka Assam ba katei ka jaka ka hap hapoh West Karbi Anglong District.
