Shillong, K’lyngkot 20 : U Lamphang barim ka Iingdorbar Thaw Ain ka Jylla bad CEM barim ka KHADC Bah Bindo M Lanong ula ong ba bun na ki Nongialam jong ka United Democratic Party (UDP) ki la “kut” bad kim thikna shuh ban nang jop ha ka elekshon MLA-2023.
U Bah Bindo uba dei uwei na ki Nongseng jong ka UDP, dang shen ula shah kyntait ia ka ticket jong ka party na Nongkrem Constituency. Ula kynnoh ba ka UDP kala lehklet ia u bad ai ia ka ticket sha u Bah Lambor Malngiang, uba dei u MLA ba dang shu iehnohkam shen.
“Ar ne lai ngut ki Nongialam kiba don bynta ha ka jyrsieh ai ticket jong ka UDP, kila kut, kim don lad satia ban jop” ong u Bah Bindo.
Hynrei u Bah Bindo ula pynpaw ba u don bha ia ka lad ban ioh ia ka jingjop. “Nga la trei shitom bad iakynduh ia ki briew ha ki shnong ki thaw, nga la ioh ia ka jingkyrshan kaba khlain” ula bynrap.
Haba pynpaw ia ka kam Nongialam hapoh ka UDP kum ka jingeh ia ka party, u Bah Bindo ula ong “Ha ka por ba thaw ia ka UDP, kim shym la don lang satia…kim pat don satia ha ka kam sain pyrthei ruh…baroh ki dang dei tang ki junior (khynnah hapoh) jong nga. Nga la wan ialam ia u Bah Jemino ha u 2013 bad ula jop, Metbah ula pyniasoh sha ka UDP ha u 2008…shano kine ki don ha ka por ba thaw ia ka UDP ha u 1997”.
“U Bah Paul Lyngdoh ula wan ha u snem 2009..nga la de pong ia phi…ar, lain gut ki Nongialam kila kut…ki paidbah kin ai ia ka bainong” ula bynrap.
“Ka UDP ka dei ka khun jong nga, nga don lang ha ka por baka kha” ong une u Nongseng jong ka UDP uba la iadonlang bad ka party naduh ka sngi ba nyngkong.
