Shillong Nailar 05: U Myntri Rangbah ka Jylla u Conrad K. Sangma hynne ka sngi Baar, ula pynbna ba ka sorkar kala bhah T.240 Klur na ka bynta ki 3 snem ban wan hapoh jongka Floriculture Mission 1.0, da ka jingthmu ban pynkylla ia ka jylla kum ka shlem kaban ialam ha ka kam pynmih ia ki syntiew ki skud ha ka thain shatei lammihngi bad ha ka ri.
Haba ai jingkren ha ka jingleit jurip ia ka shnong Mawkriah, East Khasi Hills, ha ryngkat ka jingsynran lang ka Myntri ka rep ka riang ka Dr. Ampareen Lyngdoh bad u MLA u Bah Ronnie V Lyngdoh, u Myntri Rangbah ula pynpaw, ba ka jingthmu jong ka mishon ban pynlong ia ka Floriculture ne ka jingpynmih ia ki syntiew ki skud kaba don ia ka dor, kaba lah ban kyrda ia ka jinglong ka suinbneng bad ban pynneh ia ka kamai kajih.
La sdang ia ka ha u Lber 2024, ka mishon ka thmu ban ai jingmyntoi palat 3,000 ngut ki nongrep da kaba ai ia ka subsidy kaba T.7 lak kaban kynthup ia ka jingthied ia ki jingdonkam, ki jingtei bad ka jingai jinghikai. Haduh mynta kumba 500 ngut ki nongrep kila ioh jingmyntoi na kane ka prokram.
“Kane kadei ka jingbei tyngka kaba heh tam kaba kano kano ka sorkar kan leh ha kaba iadei bad ka Floriculture ha Meghalaya,” ong u Myntri Rangbah. “Ngi khmih lynti ba kan ai ia ka jingpynmih ia ka khajna kaba T.600 Klur lyngba kane ka mishon ha kine ki snem ban wan”.
Ka scheme kan phaikhmat ha kaban rep ia ki syntiew kiba rem kum ki Orchids (Dendrobium, Cymbidium, Vanda bad Phalaenopsis) bad Oriental Lilium, kiba long kiba jur bha ka jingdawa hapoh ri India bad ha ki iew kiba don ha kylleng ki ri. Ka jinglong kyrpang jong ka jylla ha kaba iadei bad ka jinglong jingman ka suinbneng ka long kaba iahap bha ban thung ia ki syntiew ki skud kiba bun jait.
Ban pynthikna ia ka jingdon ia ka kyrdan bad ka jingpynneh pynsah, ka sorkar kala shim ia ka jingiatreilang bad ki artylli ki kynhun kiba ai jingshakri kiba kynthup iaka Darjeeling Gardens bad North Bengal Floritech – kiban ai ka jingbatai kaba kyrpang, ki tiar ki tar ban rep ban riang, ka jingkyrshan ha kaba iadei bad ki jingtei bad ban pynioh ia ka jingkhaii pateng ha ki iew ki hat lyngba ka jingiapynbeit ban thied haduh 3 snem.
“Ki syntiew kiba mih ha ka thain kidei kiba la pynkhreh mynta ban sdang noh da ka buit jong ka jingrep da ka jingstad saian” ong u Myntri Rangbah bad ka bynrap “Ngi dang tei ia ka jingkhlain jong ka jylla ha ka jingdon jingem kaba kyrhai bad ban leh ia kaei kaei kaba thymmai lyngba ka jingpynbha iaka rukom treikam”.
Ka Floriculture Mission kadei shi bynta jongka jingiohi jngai ha kaba iadei bad ka rep ka riang ha ka jylla, kaba kynthup ia ka jingseisoh ki prokram kum ka Lakadong Turmeric Mission, ha kaba ka jingpynmih kala nang kiew na ka 1,000 MT sha palat ia ka 20,000 MT.
Ban pyndap ia ka jingdawa bad ia ka jingkyrshan ban pyniar ia ka jinglong jingman ha ka kam pynmih ia ki syntiew ki skud, ka sorkar ka don ia ka jingthmu ban buh ia ka Storage kaba kyrpang bad ki lad ban kit ban bah ha kylleng ki jaka kiba khlain ia ka jingpynmih. Kine ki shlem kin pynthikna ba kan don ka jingpynkit ha ka por kaba biang, ban pynneh pynsah ia ka jinglong ki syntiew bad ban don ia ka iew ka hat kaba biang na ka bynta ki nongrep.
U Myntri Rangbah ula ong ruh, ba ki sienjam kum ka CM’s Farm Plus, CM-Assure bad kiwei, kidei kiba la kyntiew shaphrang na ka bynta ban ai jingkyrshan ia ki nongrep ha kylleng jong ka jylla Meghalaya.
