Tura, Nailar 05: Ka jingwad ia u Sub-Divisional Agriculture Officer u Teseng M Sangma, uba la jah hapoh ka Wah Ganol kala bteng biang hynne ka sngi baar.
Ka jingwad ia une u ophisar kala iaid mynta la 3 sngi lynter, ha kaba ki kynhun jong ka Special Rescue Team (SRT), State Disaster Response Force (SDRF), ki pulit jongka Araimile Police Station bad ki nongshong shnong ka thain Ganol kila bteng ban iatreilang bad wad ha kylleng ki bynta kiba kynthup ia ka Pelga Wari, Domesal Wari bad Waa Wari.
Katba ka SRT Unit na Tura kala pynleit jingmut sha ki bynta kiba sharum jong ka Pelga bad Domesal Wari, katba sa kawei ka kynhun jong ka SRT pat kala wad ha ki jaka kiba don naduh Damalgre shaduh Waa Wari.
Ka jingwad ia une u ophisar kala long kaba eh bad jynjar bha namar ka jinglong riat bad ka jingkiew ka um ha ka wah Ganol.
Halor kane ka jingjia, ka District Disaster Management Authority (DDMA) kala pynmih ia ki katto katne ki jingbthah na ka bynta ka jingshngain jong ki paidbah:
• Ban khmih ia ka jinglong jingman jong ka suiñbneng shwa ban leit shano shano.
• Pyntip sha ki bahaiing bahasem ne paralok ia ki jingthmu bad ia ka por ban wanphai.
• Kiar ban leit sha ka um kaba jylliew, ki maw kiba syntuid bad ki jaka kiba sañium.
• Phong ia ki kynja tiar kiban ym ngam jyllop bad ban rah ia ki tiar ki tar kiba kongsan khamtam ia ki tiar ban pyndonkam ha ka por ba mynsaw ne First Aid Kit.
• Phong ia ki juti kiban ym syntuid bad ban khmih ia ki maw ban ym btuid.
• Wat nym khwai marwei bad kiar na ka jingdih kyiad ha ka por ba khwai dohkha.
• Wat nym jngi ha ka um kaba jylliew.
Ki bor khmih kila banjur ia ka jingkongsan ia ki paidbah ban ai ka jingiatreilang bad ka jingpynsngewthuh na ka bynta ka jingshngain, katba kane ka jingwad ka dang iaid shakhmat hapdeng ka jinglong jingman kaba eh bad jynjar.
