Shillong, Rymphang 07 : Ka Khasi Students’ Union-Shella Unit, ha ka sngi Saitjain, kala ioh bat bad beh krad ia 11 ngut ki bar jylla kiba thmu ban leit trei ha kompani Lafarge.
Kat kum ka kyrwoh, la iathuh ba kine ki bar jylla kila kynnoh ba don uwei u engineer jong ka kompani uba pha wan ia ki ban bylla.
Ha ka jingtalasi, ka KSU-Shella hapoh ka jingialam u Finance Secretary bad Publicity Secretary, kila lap ba kine ki bar jylla kim don satia ia ki kot ki sla kiba biang lait noh tang ka Aadhaar Card bad ka EPIC bad la pyntip ba ki dei kiba wan na Assam.
Namar kane, ka Seng kala beh krad syndon iaki bad phah leit phai sha ka jaka ba ki wan.
Ka KSU kala byrngem ruh ia kito ki briew kiba mlien ban wan ialam nongbylla bar jylla khlem ki kot ki sla kiba biang, lada dei mano mano ruh, lada lap, ka seng kan leh da kaba tyngeh.
