Shillong, Rymphang 27: U Myntri Rangbah ka jylla Conrad K Sangma ula ong ba ka sorkar jylla kala dep ban pyni bad bat ia ka jingkular ban pynthikna ba ka jingtih dewiong kan sdang noh katkum ka jingstad Saïan ne Scientific Mining ha ka jylla Meghalaya.
Ula kren ia katei hadien ba u Nongialam ka Liang Pyrshah na ka AITC Dr Mukul Sangma ula pynpaw ba ka sorkar jylla ka la ban sdang ia ka Scientific Mining tang ban plie lad ia ka jingtih bad khaii be-ain ia u dewiong ha ka jylla.
“Nga ngam don eiei ban kynthoh ia kane kaba u (Mukul) u pyrkhat hynrei na ka bynta jong ngi kum ka sorkar, ngi lah kular ban pynthikna ba ka scientific mining ka dei ban sdang noh bad ki kam ki jong ngi, kila pyni ba ngi lah bat ia la ka jingkular lem kumta ngin long tang kiba la shu pynsahteng ia ka kam bad ban ym leh eiei kumba la leh ha ki por kiba la dep” ong u Conrad Sangma haba iakren bad ki nongthoh khubor ha ka sngi Balang.
U Myntri Rangbah ka jylla ula pynkynmaw ruh ba dei kane ka sorkar kaba la iakhun pyrshah ia ka hukum jong ka NGT ba khang ia ka jingtih dewiong bad ula ong, “Kadei kane ka sorkar kaba la iakren bad treilang bad ka Sorkar India ban mynjur ia ki jingbthah bad ia ki kyndon bala buh ha ka ban pynthikna tuh ba ki par jong ki riewshimet kin ioh ia ki Mining Plan”.
“Kumta ka jingleh jong ngi, kala pyni ba ngi la shimkhia ia ka jingkular ban pynthikna ba ngin lah ban sdang ia ka Scientific Mining khnang ba ki kam kin iaid noh shakhmat ha ka lynti kaba shai kdar bad kaba khuid ba suba bad kam don kaei kaei kaban palat ia kata. Kumta lada uno uno u riewshimet u don da kawei pat ka rukom pyrkhat, kadei hi ia uta u briew ba yn pyrkhat kumtei, hynrei ka jingthmu ka jong ngi ka long kaba shai kdar na ka kam kaba ngi trei ba ngi la pyni bad kumba nga ong mynta ngi lah sdang ban ioh ia ka resol na ka kam kaba ngi lah trei na ka liang ka jong ngi” ula ong.
