Imphal, Naiwieng 05: Ban bteng ia ka thma pyrshah drok jong ka sorkar Manipur, ka kynhun synrop na Kangpokpi district’s forest division ha ryngkat ki bor pulit kila pynjulor noh ia haduh kumba 10 akar ki jaka rep poppy beain hapoh ki thain jaka lum jong ka Kanglatongbi Kangpokpi Reserved Forest (KKRF) ha kane ka sngi Palei ba la lah.
“U heh ka tnat forest jong ka district (Motbing Range) uba la lamkhmat ia ka kynhun, ula dep lypa ban sdang ia ki sienjam na ka bynta ban ujor da ka FIR pyrshah ia kito kiba don bynta ha kaba rep poppy beain,” ong ka tnat forest ka Kangpokpi.Ki jingpyrshang ban tehlakam ia ki kam beain bad ia ka kam rep poppy kan dang iai bteng, ka la ong shuh shuh.
Na ka liang u Divisional Forest Officer (DFO), Kangpokpi forest division, u N Ganesh ula maham tyngeh ia kito ki shnong hapoh ka thain ban leh da kaba tyngeh pyrshah ia kito kiba donkti ha kaba rep beain ia u syntiew poppy ha ki jaka jong ka tnat forest.
Ia ka jingtohkit pyrshah ia kiba donkti ha katei ka kam rep poppy beain yn shim da ka division ha ryngkat ka jingiatreilang bad ki bor pulit nalor ka tnat narcotic & affairs of border (NAB), bad kiba donkti kin shah pynngat lang ha ki kyndon jong ka Indian Forest Act, 1927 bad ka Narcotic Drugs and Psychotropic Substances (NDPS) Act, 1985.
Da kaba ai ka jingiarap ia ki nongtrei jong ka tnat forest halor ka jingpeitngor ka jong ki ia ki khlaw ki btap, na ka liang u Ganesh ula ong bad ka jingbishar bniah kaba kongsan ia ki jaka khlaw jong ka tnat forest ka dei lyngba u satellite.
Shuh shuh na ka liang u DFO ula iai ban ruh ba katkum ki kyndon jong ka Section 26 jong ka Indian Forest Act, 1927, ka jingrung beain, ka jingpynkhuid, ka jingpynkylla jaka rep lane kiwei pat ki jingpyndonkam hapoh ki jaka khlaw jong ka tnat forest ki dei kiba la khang pyrshah katkum ka ain.
