Shillong, Naiwieng 05 : U Assistant Inspector General of Police (A) barim ka Jylla bad Commandant ka SF-10 Bah GK Iangrai hynne ka sngi saitjain ula ong ba um dei satia ban shah pynngat kam bymman kat bym pat dep shong bishar da ka iingkashari.
Haba iakren bad ki nongthoh khubor hadien ba pyllait ia u na Shillong Civil Hospital, I Bah Iangrai ula pynpaw ba u don ia ka jingngeit kaba skhem ha ka lynti jongka ain ban wad ia ka jingshisha la u donkti ne em ha ka jingkynnoh pyndonkam bakla ia ka pisa.
Haba kylli la ki dang don ki briew kiba donkti ha kane ka jyrsieh, une u heh Pulit ka shah kem ula ong “Nga ngeit ha ka jingiaid lynti ka Ain bad nga kyrpad ia phi ban nym pynngat kam bymman ia ka hashuwa ka jingshong bishar ka Iingkashari”.
U Bah Iangrai ula pyntip b aula shu lait im da ka said da ka jingieid u Blei na ka jingshitom kaba buh jingma iaka jingim ka jong u.
Ha ka 2 tarik Naiwieng, ki Pulit ka CID kila kem ia u Commandant ka SF-10 Battalion Bah G.K. Iangrai halor ka jingkynnoh donkti ha ka jingpyndonkam bakla ia ka pisa ban tei ia ka NERS-PSAP ha Sadar Police Station Complex.
U Bah Iangrai uba dei u AIG (A) barim kaTnad Pulit, ula shah kem nala ka jongka Iingsah na Shyiap, Golflink hadien ka jingkhynra.
Ha kajuh ka por, u Myntri kam pohiing ma Lahkmen Rymbui ula pyntip ba u Bah Iangrai ula shah sospon mynta na la kam hadien kane ka jingshah kem.
“U Bah Iangrai ula shah shah sospon bad ka Ain kan iaid la ka jong ka lynti” ula ong haba pyntip ba ka Tnad Pulit kala dep ban register case pyrshah ia une u Heh Pulit bad ka jingtian bishar kan sa iaid mynta.
Hashuwa kane, u Inspector General of Police (IPG) CID Bah O Pasi, ula pyntip ba ka Tnad kala register case ha ka 28 tarik u Risaw halor ka jingkynnoh ba u Bah GK Iangrai ula pyndonkam bakla ia ka pisa ha kaba tei ia ka NERS-PSAP ha Sadar Police Station Complex.
Hashuwa Kane, ka kynhun Fact Finding Team bala khlieh da u Inspector General (Law & Order) Mukesh Kumar Singh kala lap ia u Iangrai halor ka jingkynnoh thied beain ia ki 29 tylli ki kali mynba u dang bat ia ka kam AIG (A) khlem da ioh jingbit na ki bor ba halor.
