Nongpoh, Naiwieng 06: Ban nang kyntiew ïa ka rukom sumar khasi kaba la lamkhmat naduh ki mynbarim bad ruh ban ïada ïa ki dawai kynbat ki bapher bapher, ka kynhun ki nongsumar pang khasi kiba la tip kum ka Ri Bhoi District Traditional Healer Association ki la pynlong ïa ka jingïakynduh lang ha Pahamsyiem, Nongpoh.
Ha kane ka jingïalang, la wan ban ai mynsiem ruh da u MLA ka Nongpoh Konstituensi Bah Mayral Born Syiem, Bah Ïasper D Manih, President, Bah Elington Syiem, Secretary ka kynhun ki nongsumar khasi bad kiwei kiwei kiba la mihkhmat na ki 7 tylli ki sub-circles
Haba kren ha kane ka sngi, u Bah Ïasper D Manih, u la pynpaw, ba kum ka kynhun ki nongsumar khasi, ki la shim biang ïa ka rai ban nang pynneh pynsah ïa kane ka rukom sumar bad khamtam ban sumar ïa ki dawai kynbat kiba don ha kylleng ki khlaw ki btap.
La ïathuh ruh ba ka kynhun ki nongsumar khasi, kan tei noh ïa ka jaka sumar kaba la tip kum ka Meghalaya Traditional Healing Clinic ha ka shnong Pahamsyiem ha Ri Bhoi District, hadien ka jingïoh jingïarap lane pynmang pisa na ka tnad Bio Resource Development Centre jong ka tnad Planning ka sorkar jylla Meghalaya ha ka jinglut kaba la kot kumba 8 lak tyngka.
