Shillong, K’lyngkot 25 : U Lat ka Jylla CH Vijayashankar ula ban jur ia ka jingkongsan jong ka hok ban thep vote kum ka nongrim ba kongsan jong ka riti synshar paidbah bad khot ia ki nongshongshnong, khamtam ki samla bad ki nongthep vote ba nyngkong, ban iashimbynta shitrhem ha ka jingiajied nong mihkhmat.
Ula ai ka jingiaroh ia ka Election Commission of India (ECI) bad ki bor pyniaid elekshon ka Jylla ha ka ban pynthikna ia ki elekshon kiba laitluid, bym shah liang, kaba kynthup ia baroh bad kaba leh haba shit haba shai.
U Lat ula pynpaw ia kane haba ai jingkren ha ka State-Level Natonal Voters’ Day (NVD) 2026 bala pynlong ha Lok Bhavan ha ka sngi U Blei. Kiba donlang ki kynthup ia u Chief Secretary ka Jylla Shakil P Ahammed.
Ka matpdeng jong ka NVD 2026 ka dei “Ka Ri India jong Nga, ka Vote jong Nga” ryngkat bad ka jingthoh “ki Nongshong shnong ha ka dohnud jong ka riti synshar paidbah ka ri India”, kaba pynpaw ia ka bynta jong ki nongshongshnong ha kaba pynskhem ïa ki jinglong jingman jong ka synshar paidbah lyngba ka jingïashim bynta kaba don jingtip bad kaba don akor ha ki elekshon.
Kum shibynta jong ka jingrakhe, la pynlong ruh ia ka Democracy Run ban kyntiew ia ka jingsngew thuh shaphang ka elekshon bad ban pynshlur ia ka jingiashim bynta ba shitrhem ki nongshong shnong.
Ia kane ka jingmareh la khaweh lama da u Lat ka Jylla ha ka jingiadonlang u Chief Electoral Officer Dr BDR Tiwari na Lok Bhavan, Shillong.
Kane ka Democracy Run kala sakhi ia ka jingiashim bynta na ki nongshongshnong, ki samla, ki nongtrei Sorkar bad ki volunteer ba wan na kylleng ka Jylla.
