Shillong Nohprah 08: U Lamphang ka ïingdorbar thawaiñ ka jylla Bah Metbah Lyngdoh hynne ka sngi palei ula ban jur ia ka jingdonkam ka jingtrei shitom ban pynjanai ia ka rukom ai jinghikai ha ki skul bad jaka pule ka hapoh ka Jylla.
U Bah Metbah haba ai jingkren ha ka jingïalang pynhap pyrda noh ïa ka jingrakhe 175 snem jong ka Cherra Presbyterian Secondary School bad ka Sohra Presbytery, u la ong ba ki khynnah skul, ki kmie ki kpa bad ki nonghikai kidei ban shim lang iaka jingkitkhlieh ban kyntiew ia ka kyrdan haka pule puthi.
Ula kyntu ïa ki nongpyniaid skul, ba kin trei tyngeh ha ka ban tei iaka jinglong jingman jong ki khynnah bad ba kin long kiba sngewsarong iala ka kolshor bad iala ka riti dustur tynrai.
Ka Cherra Presbyterian Secondary School kadei kawei na ki skul kiba la rim tam ha ka jylla bad kaba la lah ban rakhe ïa ka jingdap 175 snem naduh ba la sdang ïa ka.
“Nga sngewkmen ban ïohsngew ba kane ka skul kala pynmih bun bha ki khynnah skul kiba la long ki riew pawkhmat bad ban pynmih ruh ki nongmihkhmat kum u Symbud Lamphang barim jong ka Lok Sabha u Bah G.G Swell uba la khlad noh bad arngut ki Myntri Rangbah kiba kynthup ïa u Bah BB Lyngdoh bad u Dr. Donkupar Roy kiba la khlad noh bad u Bah S.P. Swer uba long u nongmihkhmat uba nyngkong eh sha ka Ïing Dorbar Thaw Aiñ na Sohra konstitwensi bad kiwei kiwei ki khynnah kiba la pass na kane ka skul,” ong u Bah Lyngdoh.
U bah Metbah u la ai ruh ka jingïaroh ïa ki nongseng jong ka skul bad ki Missionary kiba la seng ïa ka jaka pule bad ïa ka jinglah jong ki ban trei na ka bynta ki jaitbynriew bad ban ai jingïaroh ruh ia ki pastor, ka managing committee jong ka skul bad ka presbytery ïa ka jinglah jongka ban kyntiew ïa ka skul kumba ka long mynta.
Haba ban halor ka jingjanai bad jingkynsai jong ka pule puthi, u Bah Metbah u la ong, “Ka skul kam dei tang ban pynmih ki ïa ki khynnah skul hynrei kadei ban pynmih ki khynnah skul kiba kynsai kumba dawa ka kyrteng jong ka skul, ba ki khynnah kin lah ban wanrah nam ïa ka skul bad ia ka jylla baroh kawei”.
U Lamphang ka Ïing Dorbar, u ai khublei ruh ïa ki nonghikai namar ka jingdon bynta jong ki kaba khraw bad jingkitkhlieh ban pynjanai ïa ka jingmut jingpyrkhat bad jingim jong ki khynnah.
Shuh shuh, ula ong, ka skul ka dei ban ïai bteng ban pynmih shuh ki nongmihkhmat bad nongïalam kiba janai, kiba don ka jingkitkhlieh ban trei na ka bynta ka jaitbynriew.
“Ki khynnah skul kidei ka lawei bad ki nongioh pateng jong ka jaitbynriew, namar kata ka daw, la dawa ban don iaka jingjanai ha ka pule puthi khnang ban lah ban ïalam ïa ka jaitbynriew”, ong u bah Lyngdoh.
Ban kyntiew ïa ka skul sha ka Higher Secondary, u Bah Metbah ula ai ka jingmynjur ba kane ka skul kala donkam ban shah pynkyntiew sha ka Higher Secondary School.
Katba u bah Titosstarwell Chyne, u CEM jong ka KHADC haba ai jingkren kum u symbud kongsan u la ban halor ka jingdonkam ban kyntiew noh ïa ka skul bad ula kular ban ïarap T.20 Lak ïa ka skul na ka scheme MDC, ban pynbiang ia kiba bun ki jingdonkam hashuwa ban kyntiew ïaka na ka Secondary sha Higher Secondary School.
