Shillong, Nailar 05: U Lamphang ka Iingdorbar Thaw Ain ka Jylla Bah Metbah Lyngdoh hynne ka sngi thohdieng, ula ban jur ia ka jingdonkam jong ka Science & technology ban kyntiew ia ka ioh ka kot.
U Lamphang ula kren ia kane haba plie ia ka International Conference kaba ar sngi jong ka University of Science and Technology Meghalaya kaba la pynlong halor ka Phang “Innovation in Management, Science & Technology”.
“Ka Science & Technology ki long kiba donkam bha ha kane ka juk kaba mynta ban kyntiew iaka ioh ka kot bad kane ka jingialang kan plie iaka jingkhang kaba thymmai ban wad bniah ha kiba bun ki bynta” ong u Bah Metbah haba bynrap ba ka Science & Technology ka don ia ka bynta kaba khraw bha ban tei iaka lawei jong ka ri India.
U bah Metbah Lyngdoh ula iaroh iaka USTM kaba la phaikhmat sha ki samla kiba wan na ki longiing baduk na ki thain nongkyndong.
Ia katei ka dorbar la pynlong da ka Department of Computer Science & Electronics, USTM ryngkat ka jingiatreilang bad ka American Institute of Management & Technology (AIMT) ia kaba la kyrshan da ka University of Maryland Eastern Shore (USA).
Kila don bun ngut ki riewstad bad ki riewshemphang na ki 15 tylli ki ri kiba la wan iashimbynta ha katei ka dorbar kaba ar sngi bad yn iohpdiang ruh kumba 200 tylli ki Research Paper na ki riewshemphang na ri India bad nabar ri ruh lyngba ka online bad offline.
Ki Nongshah khotsngewbha kiba wan na kylleng ki Ri kila pyllait paidbah ruh ia ka Conference souvenir ban sah jingkynmaw.
Ha kajuh ka por, ka USTM ka la pynhap pyrda noh iaka National Exhibition bad Seminar kaba 5 sngi halor ka Phang “Plasma Physics” kaba la pynlong ha ka skulbah USTM ia kaba la wan ban iashimbynta da palat 1000 ngut ki samla pule na ki skul bad ki college bapher jongka thain hapoh ka jingbtin lynti jong ki Scientist na ka CPP-IPR Department of Atomic Energy, jong ka sorkar India.
U James P. K. Sangma, Myntri ka koit ka khiah ka jylla uba la shah khot kum u kongsan, ula sam ia ki Certificate sha ki khynnah kiba la wan iashimbynta bad ula plie ruh iaka Salim Ali Museum of Biological Diversity kaba don ha I-Block jongka USTM.
Ha kane ka jingialang la ioh ruh iaka jingkren na u Dr. A. V. Ravi Kumar jongka IPR, Gujrat, Prof. Jatindra Kr. Deka, Department of Computer Science & Engineering, IIT Guwahati, Prof. Nityananda Sarma, Department of Computer Science & Engineering, Tezpur University (Central); Dr. Kate Brown, University of Maryland Eastern Shore, USA; Prof. Aaron Rababaah, American University of Kuwait, Kuwait, Prof. Ashish Gadekar jongka AMITY Institute of Higher Education, Mauritius, Prof. Daniel Okunbor na Fayetteville State University, USA, Prof. Biswajit Sarkar na ka Yonsei University, South Korea, Prof. R. Sivasamy, University of Botswana, Botswana bad kiwei kiwei..
