Boko, Jylliew 24: Ha ka miet jong ka sngi Baar kala don ka jingpluh kaba jur ha Dakuwapara ha Boko, Assam, ha kaba 3 tylli ki dukan kiba don harud surok kila shah bamduh ha ki thyllieh ding bad pynsyier ruh ia ki nongshong shnong.
Kane ka jingpluh ding kala sdang na ka bynta kaba shakhmat jong ka Kalyani Hospital bad kala pur sted sha ki jingtei hashwa ban wan poi ki kali pynlip ding ha katei ka jaka. Ki nongshong shnong kila suba jur ba kane ka jingpluh ka lah ban dei na ka jingbthei jong ka Gas Cylinder, hynrei ia kane haduh mynta ym pat lah ban pynshisha.
Kine ki dukan kiba la shah bamduh ha ka ding, kidei kiba la longtrai da u Dulal Das bad arngut kiwei pat ki nongkhaii, ha kaba kila mad ia ka jingduh nong kaba khraw haba baroh ki jingdon jingem kila kylla dpei lut.
Ki pulit jongka Boko Fire and Emergency Services kila leit mardor sha katei ka jaka bad iakhun ia katei ka ding kaba la klang bha bad khatduh kila lah ban tem noh ia kane ka ding hadien bun kynta.
Ha kane ka jingjia ym shim la don mano mano ruh kiban mynsaw bad ka jingtohkit halor kane ka jingjia ka dang iaid shakhmat.
Kiba bun ki paitbah kila pynpaw ia ka jingsngewkhia ha kaba iadei bad ka jingshngain bad ka jingdonkam ia ki lad ban iada na ki jingpluh ding khamtam hapoh ka jaka iew, kiba don ia ki dukan kiba mar syndait bad ka jingpyndonkam ia ki LPG Cylinder kadei kaba buh jingma bha.
