Shillong Jylliew 24: U Additional Deputy Commissioner, Pynursla Civil Sub-Division u Bah G. Warjri, hynne ka sngi Balang, ula pynbna ba hadien ka jingkhang ia ka leit ka wan lyngba ka surok Shillong Dawki namar ka jingdon ka jingtwa kaba jur, kumta la bthah ia ki paitbah bad ia ki kali ba kin iaid noh na ka surok Laitlyngkot – Iew Mawiong -Umthli -Nongthymmai – Laitkynsew NH Point.
U Bah Warjri ula pyntip ba ki paitbah ki lah ban iaid na kane ka surok naduh ka por 10 baje mynstep haduh ka por 4 baje janmiet bad ha ka por mynmiet naduh ka por 10 baje mynmiet haduh 5 baje mynstep.
Kane ka jingshah iaid ia ki kali na (Laitlyngkot-Pomlum) kan dei thik tang na ka bynta ki kali rit hynrei naduh Pomlum shaduh Mawlieh yn shah ban iaid ia ki kali rit bad kiba heh.
Ia baroh ki kali yn shah ban iaid ha baroh ar (Lyngkyrdem & Laitlyngkot) tang haduh ka por 10:30 mynstep bad hadien kane yn sdang noh ia ka jingtreikam jong ka kompani ban shna ia katei ka bynta jong ka surok.
Namar ka jingwan ka aiom lyiur la bthah ia ki nongleit nongwan bad ia ki paitbah ba kin long kiba phikir bha haba ki iaid lyngba katei ka surok bad ban kiar ha kaban shu iaidkai hadien ba kala don ka jingslap ne wat ha ka por mynmiet.
U ADC ula pyntip ba ia ki kali kiba kynthup ia ki kali kit nongpang, kali pynlip ding bad jong ki pulit lah ban shah iaid ha ka por ba don ka jingkhang ia katei ka surok bad ki lah ban pyntip da kaba phong ha Pynursla Police Station ha u Phone Number: 9862251116 na ka bynta ka jingshngain ha ka leit ka wan.
Kane ka jingpynbeit thymmai ia ka rukom iaid ki kali kadei hadien ba kala don ka jingdkut noh jong ka surok ha Laitlyngkot-Lyngkyrdem na ka jingtwa kaba jur kaba la jia ha ka 21 tarik u Jylliew bad kala ktah syndon ia ka leit ka wan jong ki paitbah kane ka thain.
