Nongpoh, Jymmang 05 : Ka ding kaba rhem bha, kala bam duh haduh da ingkhong khait ia ka Iingsah jong u Rangbah Shnong ka shong Nongagang, Ri-Bhoi District Bah O Binong hynnin ka miet sngi palei.
Une u Rangbah Shnong u dang dei u bahaiing hasem jong ka samla Walinda Binong, ka samla pule kaba la suba shah pyniap hapoh ka Modi University, Rajasthan.
Kat kum ka khubor ba ioh lum, kane ka jingpluh ka iing kala jia ha ka por 10 baje ne 10:30 baje eiei katba ki trai iing ki dang don ha ka Iing jong ka samla Walinda ban leit shong pynshngain ia ki bahaiing hasem.
Haba iakren bad u Trai iing Bah O Binong, ula ong pyntip ba kane ka jingjia kala jia ha ka por ba baroh ki dang leit shong pynshngain ha ka Iingsah ka samla Walinda haba iathuh ruh ba ka jingkem ding kala jia ha ka por ba treikam ka jingpynlip bording.
U iathuh ba shuwa ba baroh kin mih na iing ban leit pynshngain sha kane ka Iing ki bahaiing, kala don ka jingpynlip bording bad kumta kila tang da u mombiti ban tbeh jingshai hynrei hadien ba kila mih na iing, kila klet ban pynlip ia une u mombiti ia kaba la suba jur ba ka jingpluh ka lah ban dei na ki phylliah ding na une u mombiti.
U pyntip ba ka ding kaba bamduh khait ia ki jingdon jingem hapoh ka Iing bad ka jingjulor kala kot shaka T. 5 lak tam.
Na ka liang ki bahaiing kila kyrpad ia u MLA ka Nongpoh ba un phaikhmat lem sha ka jingshem lanot jong kane ka longiing da kaba ai jingiarap lem ba kin ioh pyndonkam.
