Aizawl, Nailur 07: Hapdeng ki khubor ka jingther bom naphang da ki shipai Myanmar hajan khappud ka India-Myanmar, kumta ruh kane kala nang pynjur shuh shuh ia ka jingwan tuid jong ki phetwir na Myanmar sha ki bynta khappud ka jylla Mizoram naduh ka 1 tarik mynta u bnai, ong ka tyllong khubor heh sorkar.
Ha ka step jong ka 21 tarik u Nailar ba la dep, ki tyllong khubor kila pynthikna ba ki shipai Arakan Army ka Myanmar kila pynlong ka jingthombor ia ka ap pahara jong ka kynhun shipai 61st company Light Infantry Regiment ka Myanmar ha ka shnong Varang.
Ia ki liengsuin iapom ka Myanmar la iohi hajan ka shnong Zorinpui kaba hapoh Lawngtlai district ka Mizoram hadien katei ka kam thombor, ong shuh shuh ki tyllong khubor.
Na ka liang u heh sorkar ka Mizoram ula ong ba kala don biang ka jingwan tuid jong ki briew napoh Myanmar ha ki thain shatei ba pajih ka Lawngtlai district hadien ba kala mih ka jingialeh markylliang hapdeng ki shipai ka Myanmar bad ki riewialeh pyrshah Arakan Army (AA) ha ki bynta jong ka Varang ka Myanmar bad hajan ki shnong kiba don ha khappud bad ka India hapoh Mizoram.
Ka sub-divisional officer (Sadar) ka Lawngtlai, ka TT Beikhaizi kala ong kumba 589 ngut ki briew napoh Myanmar kila wan rung shapoh Lawngtlaid district ha kane ka taiew ba la dep hadien ka jingiakynad hapdeng ki shipai Myanmar bad ki riewialeh pyrshah kaba la khia ha ka 31 tarik u Nailar ba la dep.
Napdeng kine ki 589 ngut kiba la wan rung, 210 ngut kila shong riehtngen hapoh ka shnong Hmawngbuchhuah, 115 ha Zochachhuah, 127 haLaitlang bad 137 kila shong riehtngen hapoh ka shnong Dumzautlang kaba hap Lawngtlaid district, kala ong shuh shuh.
Namar ki kam thombor jong ki shipai Myanmar haduh palat 30,401 ngut ki briew napoh Myanmar kila jam lyngba ia ki jaka khappud bad riehtngen ha ki bynta bapher bapher ka Mizoram, kata naduh ba ki shipai kila kurup noh ia ka bor synshar hapoh Maynmar naduh u bnai Rymphang ba ladep, ong u myntri kam pohiing u Lalchamliana hapoh ka iingdorbar thawain.
Napdeng kine ki 30,401 ngut ki nong Myanmar haduh 29,253 ngut mynta ki dang don hapoh ki jaka riehtngen ha ka jylla Mizoram, kane ka long katkum ka kaiphot ba la phah da ki deputy commissioner sha ka tnat kam pohiing ha ka 20 tarik u bnai ba la dep, ong u myntri kam pohiing ha ka jubab lyngba ka jingthoh.
U Myntri ula ong ruh ba na ka liang ka sorkar kala dep ban ithuh ia ki 30,401 ki nong Myanmar nationals ha kaba napdeng kine la pynbiang ruh da ki identity card bad ki syrnot ban pynithuh ia ki kum ki phetwir na ka bynta ki 30,177 ngut na ki.
U Lalchamliana ula ong ruh ba na ka liang ka tnat disaster management ka jylla bad ka tnat kaba khmih halor ki jingpynbiang jaka sah haduh mynta kila pyllait ia ka jingiarap pisa kaba 3 klur tyngka na ka bynta ki jingdonkam kiba iadei bad kane ki phetwir.
Katkum u Beikhaizi uba dei u district nodal officer uba khmih halor ki phetwir ka Myanmar ula ong ba kila don haduh 5,909 ngut ki phetwir nong Myanmar kiba la wan shong riehtngen hapoh Lawngtlai district kat haduh mynta.
Hynriew tylli ki district ka Mizoram, kata ka Champhai, Siaha, Lawngtlai, Serchhip, Hnahthial bad ka Saitual ki iasam ia ki jaka jaka khappud kaba ha ka jingjngai kumba 510 km bad ka jylla Chin jong ka Myanmar.
