Guwahati, Nailar 09: Da ki spah ngut ki paidbah ka Tinsukia District ki la mih paidbah ha Tinsukia ban khang lut ia baroh ki jaka rung jaka mih ba pyniasoh ia ka Assam bad Arunachal Pradesh, namar ka jingshah pyniap jong uwei u heprit.
Ki paidbah kiba bitar halor ka jingshah pyniap u wei u heprit ba dang 12 snem hadien ba ki runar ki la rahbor ia u ha ka 22 tarik Naitung na Sadiya ha Arunachal Pradesh katba u dang leit phai sha iing na skul.
Ki paidbah ki la iamih ban pynrem jur ia ka jingjia bad kila dawa ia ki bor ka aiñ ban pynshitom tyngeh ia kiba donkti ban rahbor bad pyniap ia u ne u heprit.
Ia kane ka jingiakhih, la lamkhmat da ka kynhun jong ka Gurkha Student Union ka Tinsukia District Committee, ha kaba ki la khang lut ia ki jaka rung jaka mih ha Shantipur, Chunpura, Bordumsa, Jagun’s Namchik, Jairampur, Namdang, Kakpathar’s Dirac Gate.
Lah ban kdew, ba ki pulit ki la lap ia ka metiap jong u wei u heprit ba shah rahbor, u Rohit Chettri, hadien ba ki runar ki la pyniap bad tep ia ka met jong u ha kawei ka thliew kaba don kumba 800 meter na ka jaka ba la rahbor ha Kalikhola, Arunachal Pradesh.
Ia kane ka metiap la lap ha ka 31 tarik Naitung hadien ka jingphla jong ki arngut kiba shah kem halor ka jinguba rahbor bad pyniap ia u ne u heprit.
