Shillong, Iaiong 03: Ka Vishva Hindu Parishad (VHP) hynne ka sngi Balang, kala kyrpad ia ka President ka Ri Droupadi Murmu ba kan tuklar lem halor ka jingshah pyniap ki arngut ki nongbylla bar Jylla ha Meghalaya bad dawa ruh ba dei ban tohkit da ka CBI ne NIA ia kane ka jingjia.
Arngut ki nongbylla bar Jylla kila shah bomiap ha ka janmiet 27 tarik Lber ha Ichamati bad Dalda, ia kaba la kynnoh ba kane ka jingjia kalajia hadien ka rally pyrshah Citizenship (Amendment) Act (CAA) jong ka seng Khasi Students Union (KSU).
Haduh mynta ki Pulit kim pat pynthikna la kane ka jingshah pyniap ka dei kaba don jingiadei bad ka rally ne ka dei ka kam ba shu jia ryngkhat.
Ha ka shithi bala phah sha ka President Murmu, u Secretary General ka VHP Bajrang Bagra ula kam ba ki arngut ki nongbylla bar jylla kila shah pyniap dusmon ha Ichamati, ka shnong kaba don ha East Khasi Hills District ka Meghalaya, hadien ka rally pyrshah CAA.
“Kaba sngew thamula ka long ba ka District kala lait na ka jingtreikam ka Citizenship (Amendment)Act namar ka jinghap hapoh ka Sixth Schedule. Ka dei ka jaka kaba ki kynhun sengbhalang kila pynlong ia ka rally pyrshah CAA kaba lam sha ka jingpyniap ia kine ki riew ngeit hindu ba lui lui da ki riew bymman, kumba la paw ha ki lad pathai khubor” ong u Bagra.
“Ka VHP ka kyrpad ba phin tuklar lang bad kyrpad ia ka jingtohkit kaba bniah ka ban pynlong da ka CBI lane ka NIA khnang ba ki briew ba donkti kin ioh kloi ia ka jingbishar kaba hok” ula bynrap.
Ka VHP kala dawa ruh ba ia kane ka case dei ban shim bishar da ka Iingkashari ba kyrpang ban pynthikna ia ka jingbishar kaba hok hapoh ka pork aba dei bad ba ki khun ki kti jong kine ki lanot kin ioh ia ka ‘song jingiarap, ka kam ka jam bad ki jingiada”.
“Kane ka jingthombor kam dei kaei kaei ruh hynrei kaba la plan lypa da ki kynhun bym lah ban tip, ban pyntieng pynsmieh ia ki bar jylla ba rit paidbah kiba dang bteng ban mad ia ki jingshah thombor na ka jingiapher jaidbynriew” ula ong.
U Bagra ula kyrpad ia ka President Murmu ba kan leh eiei mar mar khnang ban pynthikna ia ka jingshngain jong baroh ki jaidbynriew ritpaid hapoh ka thain bad ban tehlakam ia ki kynhun bad riewshimet kiba pynkhein ain.
Ka VHP kala dawa ruh ba dei ban leh eiei pyrshah ia kito kiba ailad ban pynlong ia kum kane ka rally wat hapdeng ka jing treikam jong ka Model Code of Conduct.
 hynne ka sngi Balang, kala kyrpad ia ka President ka Ri Droupadi Murmu ba kan tuklar lem halor ka jingshah pyniap ki arngut ki nongbylla bar Jylla ha Meghalaya bad dawa ruh ba dei ban tohkit da ka CBI ne NIA ia kane ka jingjia.){kind=link}