Nongpoh, Iaiong 2: Ka Raid Nonglyngdoh kaba kynthup ïaki 6 kur, kan pynlong biang ïaka Shad Sajer kaba shisien shi snem jong ka Raid Nonglyngdoh kaba hap hapoh ka Elaka jong ka Hima Khadar Lyngdoh.
Kine ki 6 kur ki kynthup ia ka Kur lyngdoh kum u Lyngdoh Raid, ka Kur Maring (Khon jing) kum u Syiem Sad, ka kur Lapang kum Kongsan Lapang, ka Kur Nongkyum Kum ki Doloi, ka Kur Makri kum ki Mazi bad ka kur Nongshli kum ki pator, Ka Ïa katei ka jingpynbna la pynmih lyngba u Bah Liandar Nongshli, Pator jong ka Raid Nonglyngdoh haka jingiadon lang u bah Henry Nongrum U Doloi jong ka kur Nongkyum bad u bah Dolsing Maring, U Syiem Sad jong ka Raid Nonglyngdoh.
Haba kren sha ki Nongthoh Khubor hynnien ka janmiet, u Pator Jong ka Kur Nongshli u bah Liandar Nongshli u la ïathuh ba ka Raid Nonglyngdoh kan pynlong biang ia ka Shad Sajer haka 6 tarik Ïaiong ha u Law kyntang jong ka raid Nonglyngdoh kaba don mar jan bad ka shnong Mawjong.
U Pator u la ong ka jing pynlong ia kane ka Shad Sajer ka long halor ka jingthmu ban pynneh pynsah bad ban pynim ïaka riti dustur ka shad Sajer kaba la hikai da u men barim bajah.
Ka Raid Nonglyngdoh ka khot ka wer ïa baroh ki shnong kiba hap hapoh ka raid Nonglyngdoh kumjuh ruh naka raid Nongpoh, Raid Sohkhwai, Raid Nongkharai, Raid Nongkyrla, Raid Nongkhrah nalor ki Nongialam Shnong kiba hap hapoh ka Elaka, ki Nongialam Seng Bhalang bad Ki ophisar bapher bapher jong ka District.
La pyntip ba u ADC Raja Brahma un dei u kongsan lem ha ka jingsynran lang da u Eric Dkhar BDO Umling C&RD Block, kum u Symbud Kongsan.
Ha katei ka sngi kin don ki nongrwai phawar kynthup iaka phawar puh lyngkha, phawar puh pynthor nangta ruh kin don ki jingshad tynrai kiba kynthup iaka shad mastih, shad chut wait, ka shad Dong dong, ka chad kynjuh Kynthei, ka put tulwak, ka put muiñ, ka khloi ding, ka lun synrei, ka tem maryngod.
