Guwahati, Nohprah 21:Ha ka sngi kaba nyngkong jong ka dorbar tlang kaba san sngi kynthih ka Assam Assembly, ki liang pyrshah kila mih jyndat noh hadien ka jingkyntait ia ka adjournment motion ban pynpaw halor ka jingkyndang (eviction) kaba heh jong ki bor sorkar hapoh Nagaon district pyrshah ia kiba shah kynnoh klun jaka.
Hadien ka kynta buh jingkylli ne Question Hour ha ka sngi kaba nyngkong jong ka dorbar tlang, u Lamphang ka iingdorbar u Biswajit Daimary ula pyntip hapoh ka dorbar ba ula kyntait ia ka mat ba la wanrah da ka All India United Democratic Front (AIUDF) ban iamir jingmut ha kaba iadei bad ka jingkyndang jong ka sorkar pyrshah ia ki briew kiba shah kynnoh klun jaka ha Batadrava ha ki bynta pdeng ka Nagaon district ka Assam.
Ka sorkar Assam kala pynlong ka jingkyndang ia ki iing ki sem hapoh Nagaon hapdeng ka jingpynjur pahara na ka bynta ban pynkhuid ia jan kumba 400 akar ki jaka kiba la shah kyntur.Ia kane ka jingkyndang la pynlong ha ki sawtylli ki shnong hajan Batadrava ha Bagaon kaba dei ka jaka ha kaba la kha ia u riewkhuid u Vaishnav Saint Srimanta Sankardeva, ong ka khubor heh sorkar.
“Kane ka jingkyndang naphang kala sdang naduh ka step sngi ba Ar ba la lah ha ryngkat ka jingpynap ia kumba 600 ngut ki bor pahara bad kat haduh mynta kala long kaba iaid beit iaid ryntih, ong ka Leena Doley, Superintendent of Police, ka Nagaon.
Haba kren sha ki lad pathai khubor, u nongialam liang pyrshah u Debabrata Saikia ula ong; “Ka sorkar ka dei ban bishar bniah halor kaei kaba ki leh pyrshah ia ki briew kiba la shong la sah mynta lah palat 30 snem kynthih ha kane ka jaka.Ki dei ki nongshong shnong ka India balei ka sorkar kala kyndang noh ia ki na katei ka jaka.Na ka liang ka sorkar ka dei ban pynbiang jaka na ka bynta ki briew ki bym don ka jaka shong jaka sah. Ka sorkar ka don ia ki polisi na ka bynta ki briew ki bym don jaka puta bad ka sorkar ka don ia ka jingkitkhlieh ban pynioh jaka na ka bynta ki briew kiba shah kyndang.”
“Ka sorkar ka dei ban shim da kiwei pat ki sienjam na ka bynta jong ki lem kumta kin long ki briew kiba khlem jaka shong bad kan long ka jingban khia na ka bynta ka ri.Lada la ieh ia ki briew ha ki surok hadien ba la kyndang ia ki na ki jaka kiba ki shong ki sah kumta ruh kane kan wanrah ka jingeh ia ka imlang ka sahlang.Hynrei, na ka liang ka sorkar BJP ka la iai bteng ban pynlong ia kiba kum kine ki jingkyndang hapoh Assam. Ka sorkar ka dei ban bud ia ki kyndon jong ka sorkar kaba la shai bad ki dei ban pynbiang jaka shong jaka sah na ka bynta kine ki briew,” ong u Saikia.
Na ka liang u myntri ka cabinet u Ashok Singal ula pynksan halor kane ka jingkyndang ba la leh da ka sorkar da kaba ong; “Ngi la kyndang ia ki iing ki sem kiba beain ha Batadrava kaba dei ka jaka ba la kha ia u Srimanta Shankardev.Ki briew kila kurup beain ia kine ki jaka mynta la bun bun snem bad mynta ngi la kyndang noh ia ki na kine ki jaka.Ki la leh da ka bor ban kurup ia kine ki jaka bad ka dei ka kamram ka jong ngi bad ka niam ban pyllaitluid ia kane ka jaka na ki nongleh bor,” ula ong shuh shuh.
