Shillong, Nailar 05 : Ka Sorkar Meghalaya kala pynjari da ka kowphiw miet ha shilynter ka thain Khappud bad ka Ri Bangladesh namar ka jingjur ki kam umsnam bad ka jingkylla ka Synkhar khadar ha kane ka Ri ba marjan.
Ia kane la pynbna da u Symbud Myntri Rangbah ka jylla Bah Prestone Tynsong hynne ka sngi Nyngkong haba pyntip ba kane ka korphiw miet kan treikam naduh ka por 6 baje janmiet haduh 6 baje mynstep. Kane ka korphiw miet kan treikam naduh mynta ka miet.
Ia kane ka rai la shim ha ka jingialang kaba la lum da u Symbud Myntri Rangbah ka jylla ha ka jingiadonlang u heh shipai BSF, ka Director General of Police ka Kong I Nongrang, u Chief Secretary ka jylla bad kiwei kiwei.
Haba iakren bad ki nongthoh khubor, u Bah Prestone Tynsong ula ong ba kane ka kowphiw kan treikam.noh mardor naduh mynta ka miet bad kan iai bteng beit haduh ban da pynbna da kumwei pat.
Ula ong ba kane ka korphiw kan treikam ha ki khappud baroh kiba don ha shi lynter bad ka ri Bangladesh bad kan treikam tang ha ki jaka kiba hap hapoh 200 meter na u Zero Line.
U Bah Prestone ula ong ba kane ka jingpynjari ia ka kowphie kadei kum shi bynta ban tehlakam ia ka jingwan rung jong ki briew na ri Bangladesh sha Meghalaya.
Ula iathuh ruh ba ki shipai BSF kin sa peit bad khmih bniah ia ki thain̈ khappud bad kila don 9 Batallion ki BSF kiban pahara ha ki thain khappud jong ka jylla Meghalaya.
U Bah Prestone ula ong ruh ba kane ka jingpynjari ia ka korphiw kadei hadien ba ka Myntri Rangbah Duh ka ri Bangladesh ka Sheikh Hasina, kala iehnoh kam bad phet krad na ka Ri hynne ka janmiet.
Haba kyrpad ia ki paid khappud ban ai ka jingkyrshan ba pura ia ka Sorkar, u Bah Prestone ula ong “Nga kyrpad ia baroh ki nongshongshnong ka Jylla khamtam kito kiba sah ha khappud ba kin iai shah bad ka Sorkar halor ka jingpynjari ia ka korphiw. Kumta nga ong, ngim pat tip ia ka jinglong jingman ha Bangladesh, kumta nga kyrpad ia baroh ki nongshongshnong ba kin sngewbha ban iatreilang bad ruh ban long kiba la khreh ha kaban ai ia kino kino ki jingtip ba ki ioh naba ka Sorkar bad kumjuh ruh u IG ki BSF ki don hangne 24×7”.
Haba kylli, u Bah Prestone u pyntip ba ka Sorkar Pdeng kala dep buh haduh 9 battalion ki shipai BSF ha shi lynter ka khappud ka Bangladesh ban pynkhlain ia ka jingpahara naduh ba mih ka huri hura hapoh ka Ri Bangladesh.
“Ka Home Ministry kala kular ruh ban sa nang phah shuh shuh ia ki bor pahara naba ka jinglong jingman kam long kaba itynnad” ula ong haba bynrap “Ngi la bthah ia u DIG ban iai pyntip ia ka Sorkar Jylla lada ki donkam briew lane kano kano na ka liang jong ka Sorkar, ngi long kiba kloi ban ai ka jingkyrshan” ula ong.
U Bah Prestone ula pynthikna ruh ba baroh ki nongshongshnong ka Ri India kynthup kiba na Meghalaya, kila wan phai lut shapoh ka Ri.
“Ngim don shuh ki samla pule kiba dang sahkut. Khublei ia u Blei ba baroh ki samla kila ioh wan phai suk sha Meghalaya bad shapoh u pud u sam ka Ri India” ula ong.
Ula ong ba ka Sorkar Jylla kala pyntreikam pyrrkhing bha ia ka Foreigners Act da kaba pynphai ne pynngat ia ki bar ri kiba wan rung beain.
Ia kawei pat ka jingkylli, u Bah Prestone ula ong ba namar ka jinglong jingman ha Bangladesh, baroh ki kam khaii pateng kila dei ban sangeh.
