Silchar, Nailar 12 : Hynniew ngut ki samla pule kolej ha Silchar, Assam ki la shah sospon hadien ba la lap ia ki katba ki dang ia kdup ieit hapoh ka kamram klas.
Ka kynhun jong ki khynnah shynrang bad kynthei ki ba dang pule ha ka kyrdan klas 11 hapoh Ramanuj Gupta College ha Silchar la lapdien katba ki dang ia kdup bad ia doh ieit iwei ia iwei pat hapoh ka kamram klas.Uwei na ki khynnah u ba ia pule lang ha kajuh ka klas u la ring video ia kane ka jingjia baroh ba pynphriang lyngba ki social media.
Kane ka video ka ba la saphriang sted bha ka la pynlong ia ki nongshong shnong ba kin pynmih ia ki jingkynthoh pyrshah ia ka ba kum kane ka jingleh.Ki la don ruh katto katne ki ba la kynnoh ia ki bor khmih jong ka kolej.
Na ka liang ki bor pyniaid jong ka kolej hadien ba ki la sakhi ia kane ka video ha ka sngi Balang ba la lah ki la sospon noh mardor ia baroh kine ki hynniew ngut ki khynnah. Napdeng kine ki hynniew ngut, sawngut ki dei ki kynthei bad laingut ki shynrang.
Ki bor pyniaid kolej ki la phah ruh ka jingtip sha kitei ki khynnah da ka ba ong ki la pynpaw ia ka jinglong ba sniew ka jong ki.Ka ba kum kane ka jingleh ka dei ka jingpynkhein ia ki kyndon ain jong ka jaka pule.Kumta la sospon noh ia kine ki khynnah bad ba kin ym lah ban wan mih shapoh kolej na ka bynta katto katne por.
“Kine ki khynnah ki la leh ia kane ka kam ha ka por bam ja sngi, kata ha ka por bym don ki nonghikai.Ngi don ia ki CCTV camera ha ki bynta jong ka kolej bad la khang pyrshah ruh ban pyndonkam ia ki mobile phone hapoh kolej,” ong u principal ka kolej u Purnadeep Chanda.
Nalor kata u la ong ruh ba kine ki khynnah ki dei na ka batch ka ba thymmai jong ka klas 11 bad ba ki dang shu sdang ia ka jingpule dang kumba 15 sngi naduh ba ki la sdang ban wan pule ha kane ka kolej.
